1999 թ. փետրվարի 9-ին Նոր Հաճըն-Երեւան մայրուղու մոտ հայտնաբերվել է ՀՀ ներքին զորքերի հրամանատար Արծրուն Մարգարյանի դիակը։ Նույն օրը նախագահն «Առավոտի» թղթակցի հարցին պատասխանեց. «Ամեն ինչ բավական պարզ է»։
Նույն օրը ձերբակալվեցին Արծրուն Մարգարյանի թիկնապահներ Արմեն եւ Արսեն Խաչատրյանները։ Փետրվարի 10-ին ՀՀ գլխավոր դատախազության ԼԾ ղեկավար Գուրգեն Ամբարյանն «Ազատության» թղթակցին հաղորդեց, թե չի բացառվում ինքնասպանության վարկածը։
Փետրվարի 11-ին ՆԳ եւ ԱԱ նախարար Սերժ Սարգսյանը կտրականապես հերքեց Արծրուն Մարգարյանի ինքնասպանության վարկածը։ Փետրվարի 12-ին ՀՀ գլխավոր դատախազ Աղվան Հովսեփյանն ասուլիս հրավիրեց եւ ասաց, որ նախաքննության մարմնի եւ ՆԳ նախարարության միջեւ վարկածների առումով տարաձայնություն չկա, պարզապես «ձեռք բերված տվյալների քիչ լինելու պատճառով» առաջ են քաշվել մի շարք վարկածներ։ Արծրուն Մարգարյանի ընկեր Անդրանիկ Քոչարյանը փետրվարի 17-ին մամուլով հայտարարեց, որ այս սպանությունը չէր լինի, եթե արագ բացահայտված լիներ Խորխոռունու սպանությունը։ Եվ որ այսպիսի սպանություն կարող են իրականացնել շատ փող կամ մեծ իշխանություն ունեցողները։ Գործի նախաքննությունն ավարտվում է հուլիսի 8-ին։ Այն կարճելու որոշումն արդեն կա։
Լ. Ա.
