Հունիսի 19-ին խորհրդարանում կառավարության ծրագրի հավանությանն արժանանալուց հետո համատեղ նիստ գումարեցին «Միասնություն» խմբակցությունը եւ «Կայունություն» պատգամավորական խումբը։ Թե դա ինչ հիմքի վրա տեղի ունեցավ եւ ինչու, պարզաբանում է «Միասնություն» խմբակցության նախագահ, ՀՀԿ նախագահ Անդրանիկ Մարգարյանը։
– ԱԺ կանոնակարգը չի արգելում պատգամավորական մի քանի խմբերի եւ խմբակցությունների համատեղ նիստերը։ Այսպիսով, մենք, փաստորեն, նոր ավանդույթ ենք մտցնում ԱԺ ներքին գործունեության պրակտիկայի մեջ, եւ կարող ենք ցանկացած խմբակցության ու խմբի հետ համատեղ նիստ գումարել՝ հետաքրքրող հարցերի վերաբերյալ քննարկումներ անցկացնելով ու եթե հնարավոր է միասնական տեսակետ ձեւավորելով։
Այս անգամ, քանի որ պետք է լուծվեր հանձնաժողովների նախագահների տեղակալների ընտրության հարցը, մենք փորձեցինք քաղաքական երկու ուժերով հստակեցնել դիրքորոշումները եւ ընդհանուր պայմանավորվածություններ ձեռք բերել։ Տվյալ դեպքում՝ ստացվեց։ Մեր թեկնածուներն արդեն պարզ են, եւ մնում է, որ հանձնաժողովների անդամները իրենց կարծիքները արտահայտելով վերջնական որոշումների հանգեն։
Եթե անհրաժեշտություն լինի, ապա մենք պատրաստ ենք համատեղ նիստեր անել նաեւ ՀՅԴ-ի, կոմկուսի եւ մյուս խմբակցությունների հետ։
Կարդացեք նաև
– Իսկ կառավարության կազմը նշանակելիս վարչապետը խորհրդակցե՞լ է «Միասնություն» դաշինքի ղեկավարության հետ։
– Վարչապետը «Միասնության» ղեկավարության մեջ է,- անորոշ պատասխանով էլ եզրափակեց Անդրանիկ Մարգարյանը։
Ա. Զ.
