Վազգեն Սարգսյանն այժմ երթեւեկում է ոչ նախկին վարչապետի սպիտակ «Ջիփ»-ով, ոչ էլ պաշտպանության նախարար եղած ժամանակվա իր կանաչ «Ջիփ»-ով, այլ մի բաց գույնի «31»-ով։ Ի դեպ, Կարեն Դեմիրճյանն էլ Խոսրով Հարությունյանի ժամանակ ձեռք բերված ԱԺ նախագահի «Ֆորդից» հրաժարվել եւ «24»-ով է երթեւեկում։ ԱԺ-ում այս առնչությամբ կատակեցին. «Թե տեղական մեքենա էր ուզում՝ պիտի «Երազ» նստեր»։
ՎԱՏ ԼՈՒՐ
ՀՅԴ Հայաստանի ԳՄ ներկայացուցիչ Վահան Հովհաննիսյանի՝ «Պապլավոկում» կրակելու մասին լուրը հրապարակելիս «Առավոտն» ուներ երկու ականատեսների վկայություն։ Հրապարակումից հետո մեզ հայտնի դարձան այլ մարդկանց անուններ եւս, որոնք այդ պահին սրճարանում են եղել։ Սակայն ՍԻՄ-ի նախագահ Հրանտ Խաչատրյանը մեզ չէր դիմել, այլ դարձյալ քրեորեն հետապնդելի այդ արարքի հերոսին՝ Վահան Հովհաննիսյանին, որն էլ նրան հավաստիացրել էր, թե «Առավոտի» լուրը սուտ է, քանի որ ինքն այդ ժամանակ հիվանդանոցում է եղել։ Եթե երբեմնի մաքուր ձեռքերի տերն այսչափ միամիտ է, որ հավատացել էր նման պատճառաբանությունների եւ այդ մասին չհապաղեց «Ա1+»-ով հայտարարել, գուցե արժե՞ պրն Խաչատրյանի կողմից ի սկզբանե մեղավորության կանխավարկած վայելող Վանո Սիրադեղյանին խորհուրդ տալ, որ նա էլ մի քիչ գումար ծախսելով «բյուլետեն» հանի նախորդ տարիների համար։
