Նախագահ Ռոբերտ Քոչարյանը առանձնահատուկ վերաբերմունք ունի շինարարության նկատմամբ։ Տնտեսական թեմաներով համարյա բոլոր հրապարակային ելույթների ընթացքում նա հպարտությամբ է նշում, որ իր վարչապետական եւ նախագահական պաշտոնավարման շրջանում զգալիորեն աճել է շինարարության ծավալը։ Հատկապես՝ բնակարանաշինության։
Ահա թե ինչպես է վերլուծված այս փաստը երեկ ԱԺ պատգամավորներին ներկայացրած «ՀՀ կառավարության գործունեության ծրագրում» (բավական հյութեղ մեջբերումը մեկնաբանության կարիք չունի). «Կապիտալ շինարարության աճը հիմնականում բնակչության կողմից բնակարանային շինարարության ակտիվացման արդյունք էր։ Հատկանշական է նաեւ, որ բնակչության բացասական խնայողությունների շուրջ 34 մլրդ դրամի (1998-ի ինը ամիսների տվյալներով) պայմաններում բնակչության մի մասին հաջողվել է իրականացնել շուրջ 33 մլրդ դրամի բնակարանային շինարարություն եւ կուտակել 2,3 մլրդ դրամի խնայողություններ, ինչը վկայում է բնակչության եկամուտների բեւեռացման խորացման մասին»։ Իսկ ինչի՞ մասին է վկայում։
Նույն հարցի մասին պաշտոնական տեսակետների բեւեռացման խորացումը։
Ա. Գ.
