ԱԺ մայիսի 18-ի նիստի ավարտից հետո ամենից շատ սպասված երկու դեմքերը՝ Կարեն Դեմիրճյանն ու Վազգեն Սարգսյանն այդպես էլ անմատչելի մնացին մամուլին՝ ամենակարճ ճանապարհով հեռանալով դեպի ԱԺ նախագահի աշխատասենյակ։ Մի խումբ լրագրողներ այդ պատճառով ստիպված էին շուրջ 1,5 ժամ պահակել Կարեն Դեմիրճյանի ընդունարանում, որպեսզի կարողանան մի քանի հարցի պատասխան ստանալ վարչապետ Վազգեն Սարգսյանից։
Դուրս գալով, լրագրողների առաջին իսկ հարցին նա պատասխանեց, որ, այո, տեղեկատվության պետական սեկտորում («Արմենպրես», հեռուստատեսություն, ռադիո) մի քանի օրից փոփոխություններ լինելու են, իսկ թե ինչ փոփոխություններ, պարզ կդառնա, երբ դրանք տեղի ունեցած կլինեն։
– Այն, որ կառավարության ներկայացրած ծրագիրն անցումային է, դա նշանակո՞ւմ է, որ այս կառավարությունը եւս անցումային է։
– Նոր կառավարությունն անցումային չէ։ Ծրագիրն անցումային է այնքանով, որքանով… Ի սկզբանե, ենթադրում էինք ունենալ անցումային ծրագիր, բայց փառք Աստծո, աշխատանքները սպասվածից լավ ընթացան եւ ստեղծվեց ավելի լուրջ ծրագիր, քան անցումայինն է։ Ես առաջարկում եմ այլեւս չխոսել անցումային կառավարության մասին, ժամանակավոր կառավարության մասին, դա անհեթեթ է։ Այս կառավարությունը ստեղծվել է երկար աշխատելու համար։
Կարդացեք նաև
– Պարոն Սարգսյան, տպավորություն ունեմ, որ ձեր խոսքը ոգեւորիչ էր, սակայն ռոմանտիկ։ Համաձա՞յն եք։
– Ես ներկայացրել եմ սկզբունքային դրույթներ, որոնք, այո, ե՛ւ ոգեւորիչ պիտի լինեն, ե՛ւ նաեւ ռոմանտիկ։ Դրանից են նեղանում։
– Սադոյանը բողոքեց, որ ձեր ծրագիրը վստահություն չի ներշնչում։
– Դա իր պրոբլեմն է։
– Հունվարին դուք ասացիք, թե չեք ուզում դառնալ վարչապետ, նախագահ, ԱԺ նախագահ…
– Ես միաժամանակ ուրիշ մեկնաբանություն էլ էի տվել։ Բացի այդ, ավելացավ եւս մեկ հանգամանք. ընտրությունները, «Միասնություն» դաշինքը եւ մեր պարտավորությունները հասարակության առջեւ։
– Մեկ հարց էլ։ Խոստացաք, որ այս տարի ամուսնանալու եք։ Վարչապետի պաշտոնը չի՞ խանգարի։
– Ընդհակառակը։ Վարչապետի պաշտոնը պարտադրում է դա անել։
Ա. ԶԱՔԱՐՅԱՆ
