Ամիսներ առաջ ՆԳ եւ ԱԱ նախարարության տարանջատման կողմնակիցների մասին Սերժ Սարգսյանն ասում էր, թե այդ համակարգի մասին նրանց գիտելիքները սահմանափակվում են այնքանով, որ մի երկու անգամ անցել են Նալբանդյան փողոցով եւ իրենց թաղայինին էլ ձեռքով են բարեւել։ «Առավոտի» այս հիշեցմանն ի պատասխան, Սերժ Սարգսյանն ասաց. «Այո, այդպիսի բան կար։ Ես այն ժամանակ նկատի ունեի կոնկրետ մարդկանց, մի՞թե ձեզ համար հասկանալի չէ, թե ում մասին էր խոսքը»։ Այսինքն, իր այդ գնահատականները չե՞ն տարածվում տարանջատումն ի վերջո իրականացրածների վրա, հետաքրքրվեց «Առավոտը»։ «Ոչ, իհարկե»,- ասաց Սերժ Սարգսյանը եւ հայտնեց, որ նախարարությունների բաժանման մասին այլեւս որեւէ բառ չի ասելու։
ՎԱՏ ԼՈՒՐ
«Առավոտը» փորձեց պարզել Արմեն Դարբինյանի դիրքորոշումն այն փաստի նկատմամբ, որ նոր կառավարության ծրագրի զգալի մասն իր ղեկավարած կառավարության քննադատությունն է։ Պրն Դարբինյանը ոչ մի կերպ չհամաձայնեց մեր այս դիտողությանը։ Հետո վերջապես ասաց, թե ինքը հավանություն է տվել կառավարության գործունեության ծրագրին. «Իհարկե, ես կողմնակից եմ եւ միանշանակ ընդունում եմ այն որպես կառավարության անդամ»։
