«Առավոտի» նախորդ համարում տպագրվել է ՀԺԿ անդամ Մանվել Բադեյանի տեսակետը նոր կառավարության վերաբերյալ, ուր նշված է, որ նա դժգոհություն է արտահայտել։ Սակայն խոսքն ունեցել է շարունակություն, եւ պրն Բադեյանը մասնավորապես ասել է. «Բայց դժգոհություն կարող է լինել ցանկացած կառավարության դեպքում։ Դժգոհությունները գրեթե անխուսափելի են։ Ինչ վերաբերում է այս կառավարությանը, ապա թող այն աշխատի եւ հետո կտեսնենք, թե ինչ գնահատականներով հանդես գանք»։ Ուրախալի է, որ եկել է այն ժամանակաշրջանը, երբ պատգամավորները մայրական քնքշությամբ են վերաբերվում կառավարությանը։ Նախորդ հանցավոր ռեժիմի ժամանակ նման բան չկար։
ՎԱՏ ԼՈՒՐ
Ըստ «Առավոտ» հասած լուրերի, շատ անսպասելիորեն է Ռազմիկ Մարտիրոսյանը նշանակվել սոցիալական ապահովության նախարար։ Կառավարությունը նշանակելու օրվա առաջին կեսին է միայն վարչապետ Վազգեն Սարգսյանը նրան տեղեկացրել, որ նշանակում է նախարար։ Դա, իհարկե, խոսում է կադրային խիստ սովի մասին։ Բայց մյուս կողմից մխիթարում է, որ վարչապետն, այնուամենայնիվ, չի նշանակել պրն Մարտիրոսյանին սիմֆոնիկ նվագախմբի գլխավոր դիրիժոր։
