Որ այդքան իրավունքներ է իրեն վերապահում
Թումանյան փողոցի 9, 11 ա, 11 շենքերի բնակիչների բողոքները դեռեւս անպատասխան են մնացել։ Քաղաքապետարանի թույլտվությամբ ինչ-որ մարդիկ սննդի խանութ են սկսել կառուցել։ Ապագա խանութի շենքը խանգարում է վերոնշյալ շենքերի անցուդարձին, իսկ այդ շենքերում ապրում են բազմաթիվ միայնակ թոշակառու ծերեր։ «Առավոտը» քանիցս անդրադարձել է շենքերի բնակիչների բողոքներին։ Ապագա խանութի տերերը «բուլդոզերով» քանդել են գազոնի հատվածը։ Քանդելու ու խանութ պատրաստելու թույլտվություն քաղաքապետարանը տվել է, սակայն ոչ այդչափ խորությամբ ու այդքան մեծ ծավալով։ Քաղաքապետարանից բնակիչների հարցին, թե որքա՞ն տարածք է հատկացված, պատասխանել են՝ ժամանակավոր (3 տարով) կոնստրուկտիվ փոքրիկ խանութի շինարարության իրավունք է միայն տրված։ Թումանյան հասցեի նշյալ շենքերի բնակիչների հավաստմամբ, այդ ապագա խանութի տերը նույն հասցեի շենքերից մեկի բնակիչ, «Օրինաց երկիր» կուսակցության նախագահ Արթուր Բաղդասարյանն է։
Շենքերի բնակիչները բողոքում են, որ հաշվի չեն առնում իրենց իրավունքներն ու կարծիքը։ Բնակիչները ոչ միայն անպատասխան են մնացել, այլեւ շինարարությունն արագ տեմպերով նոր ընթացք է ստանում։
Ս. ՍԵՅՐԱՆՅԱՆ
