Երեկվա «Առավոտում» ներկայացրել էինք խորհրդարանական ընտրություններին մասնակցած եւ 5%-ը հաղթահարած կուսակցությունների նախընտրական հիմնադրամում եղած միջոցների օգտագործման վերաբերյալ հայտարարագրերը՝ ըստ Կենտրոնական բանկ կատարած նրանց մուտքերի։
ԿԸՀ-ին առընթեր վերահսկիչ եւ վերստուգիչ ծառայությունից ճշտեցինք նաեւ 5%-ից պակաս ձայն հավաքած կուսակցությունների նախընտրական ծախսերը։ Դրանք ակնհայտորեն քիչ են արդեն խորհրդարանական կուսակցությունների՝ նույն նպատակով կատարած ծախսերից։ Ընդ որում՝ հիմնականում ծախսվել է ԿԲ մուտք արված դրամի ողջ պաշարը։ Հիշեցնենք, որ բանկում մնացած փողի մնացորդը փոխանցվում է պետբյուջե։
Հրանտ Բագրատյանի գլխավորած «Ազատություն» կուսակցությունը իր 2 մլն դրամը անմնացորդ նվիրաբերել է նախընտրական գովազդին։ ՌԱԿ-ի նախընտրական ջանքերը կառավարության վրա «նստել» են 3 մլն 478 հազար դրամ։ Բայց ՌԱԿ-ի պարագայում պետական գանձարանը հարստացել է 500 դրամով, քանի որ հենց այդքան գումար կուսակցությանն այդպես էլ այդ շրջանում պետք չի եկել։ «Շամիրամ» կուսակցությունը պետության մասին առանձնապես չի մտածել եւ ոչ մի լումա բյուջեին չի թողել. 1 մլն դրամը ամբողջությամբ ծախսել է։
Ամենահամեստ ֆինանսական միջոցները նախընտրական փուլում ծախսել է «Սոցուժերի եւ մտավորականների միություն» դաշինքը. միայն 370 հազար դրամ։ «Արժանապատիվ ապագան» 900 հազար դրամ մուտք է ունեցել ԿԲ, որն էլ մինչեւ վերջին կոպեկը ծախսել է։ «Հայրենիք» դաշինքը իր 1 մլն 503 հազար դրամ մուտքերից ծախսել է 1 մլն 502 հազար 50 դրամ՝ տնտեսելով 950 դրամը՝ հօգուտ դատարկ բյուջեի։ Ամենաշատ փողը (թեեւ անարդյունք) նախընտրական շրջանում օգտագործել է «Հզոր հայրենիքը»՝ 5 մլն 950 հազար դրամ։ Հետաքրքիր է, որ պետական մտածողությամբ խորհրդարանական ընտրություններին մասնակցած կուսակցություններից առանձնացել է ՀՀՇ-ն. ԿԲ արված իր 1 մլն 472 հազար դրամ մուտքից կուսակցությունը ծախսել է 1 մլն 467 հազար 288 դրամ՝ 4712 դրամով հարստացնելով մեր պետության գանձարանը։ Ավելորդ է ասել, որ կուսակցություններն իրականում անհամեմատ մեծ գումարներ են շրջանառության մեջ դրել։ Սրանք պարզապես ԿԲ արած մուտքերի տվյալներն են։ Ահա՛ այն հիմնական կուսակցությունները, որոնք թեեւ իրենց մանկության վճիտ նպատակին՝ ԱԺ-ին, չհասան, բայց հաջորդ ընտրություններին էլ կարող են նույն հաջողությամբ (կամ անհաջողությամբ) մասնակցել։
Կարդացեք նաև
Մյուս կուսակցությունների դրամապանակների պարունակության եւ շռայլության աստիճանի մասին կհայտնենք շուտով։
Լ. ԱՎԱԳՅԱՆ
