Փաստաբան Տիգրան Ջանոյանը հաստատեց «Առավոտի» ունեցած այն տեղեկությունը, որ արդեն 3 շաբաթ է, ինչ ավարտվել է «Վանո Սիրադեղյան, Վահան Հարությունյան եւ մյուսներ» անվանյալ գործի նախաքննությունը։ Դատապաշտպաններն այժմ դատախազությունում ծանոթանում են 39 հատոր կազմող գործի նյութերին, որի համար սահմանված ժամկետը հուլիսի 20-ն է։
ԿԵՆՏԿՈՄԱԿԱՆ ԲԱՐՔԵՐ
Կարեն Սերոբիչի կարգադրությամբ՝ ԱԺ վերելակներից մեկը նախատեսված կլինի միմիայն խորհրդարանի նախագահի եւ նրա տեղակալների համար, մնացածներին այդ վերելակից օգտվելը խստիվ արգելվում է։ Դա արվում է, հավանաբար, այն նպատակով, որ մանր-մունր պատգամավորներ, աշխատակազմի անդամներ եւ հյուրեր չընկնեն բարձր «նաչալստվայի» ոտքի տակ։
Կարդացեք նաև
ԱՐՄԱՏ ԵՆ ԳՑԵԼ ՆԿՈՒՂՈՒՄ
Անցած շաբաթ արդարադատության նախարարությունում գրանցվեց «Արմատ» կազմակերպությունը, որի ղեկավարը ԱԺ նախկին նախագահ Բաբկեն Արարքցյանն է։ «Արմատը» նաեւ իր գրասենյակի համար տարածք է ձեռք բերել՝ Արամի փողոցի վրա գտնվող մի առանձնատան առաջին հարկն ու նկուղն է։
ԷՍՕՐ ԼԱՎ Է, ՔԱՆՑ ՎՈՒՐ ԵՐԵԿ
Ֆինանսների եւ էկոնոմիկայի նախարարի պաշտոնակատար (Արմեն Դարբինյանի հրաժարականից հետո այդպիսին է նրա կարգավիճակը) Էդվարդ Սանդոյանին «Առավոտը» խնդրեց համեմատել ու գնահատել հին ու նոր ԱԺ-ները. «Գնահատման համար պիտի հաշվի առնենք, թե ինչպես է ընտրվել այդ խորհրդարանը։ Այս տեսանկյունից, միանշանա՛կ, ավելի լավ խորհրդարան ունենք հիմա, քանի որ ժողովուրդն է այն ընտրել»։
