Մի հարցազրույցում ՆԳ եւ ԱԱ նախարար Սերժ Սարգսյանը հայտարարել էր. «Մեր պետության մեջ պաշտոնատար անձինք կան, որոնք պիտի շատ քիչ խոսեն, թերեւս միայն այնժամ, երբ լռել չի կարելի»։ Եվ իրեն էլ համարել էր այդ պաշտոնյաներից մեկը։ Արգելված պտղի քաղցր լինելու մոլորությամբ՝ լրագրողներս համառորեն ձգտում ենք խոսեցնել Սերժ Սարգսյանին։ Երեկվա օրն էլ բացառություն չէր։
-Հետաքրքիր կազմ ունի այս ԱԺ-ն՝ հեղինակություններ, դաշնակցականներ, որ մեծ մասամբ «նստած-ելած» են, ՆԳ նախկին նախարարը, որին ցանկանում եք նստեցնել։ Պատգամավորների անձեռնմխելիությունը վերացնեն՝ խորհրդարանի կեսին կարող եք կալանավորել։
-Ընդհակառակն, ես դեռ կալանավորվածներին եմ բաց թողնում։ Ինչքան կալանավոր քիչ լինի՝ ինձ ձեռնտու է, քանի որ ցանկացած կալանավորի պետք է կերակրել, հագցնել։
– Տեղեկություններ հրապարկվեցին, որտեղ ՆԳ եւ ԱԱ փոխնախարարները Տավուշ ժամանելով փորձում էին ամեն կերպ խոչընդոտել թիվ 75 ընտրատարածքում Վանո Սիրադեղյանի ընտրությանը։
Կարդացեք նաև
-Բայց ձեր թերթն ուրիշ բան էր գրել, որ ես եմ այնտեղի շտաբի պետը (թերեւս նկատի ունի «Առավոտի» մայիսի 29-ի համարում հրապարակված մի լուրը, ուր նշել էինք, թե պատգամավորության թեկնածուներից մեկն ասաց, որ իր միակ խնդիրն այն է, որ Սերժ Սարգսյանն իր մրցակիցների շտաբի պետն է։ Քանի որ այդ օրը քարոզչությունն արգելված էր՝ չէինք նշել այդ թեկնածուի անունը։ Դա Պետրոս Մաքեյանն էր։ Հաճելի է իմանալ, որ ՆԳ եւ ԱԱ նախարարը բավարար տեղեկություն չունի «Առավոտի» խոհանոցից։ Բայց, այնուամենայնիվ, մտորելու տեղիք է տալիս, թե ինչու նա պիտի ենթադրեր, որ այդ հայտարարությունն անելու հիմքեր պիտի Վանո Սիրադեղյանն ունենար- Ա. Ի.)։ Հա, հիմա ի՞նչ ես ուզում, որ ոստիկանությունն այնտեղ ակտիվ մասնակցե՞լ է։ Բոլորդ տեսել եք, որ ոստիկանությունը, անվտանգության մարմիններն այս ընտրություններն ինչպես են կազմակերպել, այսինքն, ոչ թե կազմակերպել են, այլ ամեն ինչ արել են, որ ընտրություններն անցնեն օրենքի, օրինականության սահմաններում։ Եվ եթե հանրապետությունում գտնվի մեկը, որ ասի, թե ոստիկանությունն ինչ-որ տեղ մասնակցել է՝ այդ մարդն ուղղակի իր խղճին մեղք կանի։ Դուք ընտրություններում տեսե՞լ եք որեւէ անհարկի միջամտություն, այս ընտրությունները չե՞ն տարբերվում նախորդ բոլոր ընտրություններից։
– Ցուցակների իմաստով՝ այո։
– Բայց դա իմ խնդիրը չէ։
– Սակայն անընդհատ ասվում էր եւ նաեւ Խաչատուր Բեզիրջյանը նշեց, որ ՆԳ եւ ԱԱ նախարարությունն ուներ ճշգրիտ ցուցակները…
-Բեզիրջյանն այդպես չէր ասում։ Բեզիրջյանն ասում էր, որ մենք ավելի ճշգրիտ կկազմեինք։ Ես համաձայն եմ նրա հետ, բայց մենք դրա ոչ իրավունքն ունեինք եւ ոչ էլ ցանկությունը։ Երբ որ օրենքում գրված լիներ, որ պատասխանատուն մենք ենք՝ այո, շատ բարեխղճորեն կկազմեինք։ Բայց մի կողմից մեզ ասում են՝ «դուք չխառնվեք», մյուս կողմից էլ՝ «բա խի՞ չխառնվեցիք»։ Իսկ ինչո՞ւ պիտի խառնվեինք։ Դա մեր խնդիրը չի, բացարձակապե՛ս։ Ես իմ խնդիրների համար եմ պատասխանատու եւ ոչ թե ընտրական հանձնաժողովների կամ համայնքների աշխատանքի։
– Եթե առաջարկեմ, անկեղծորեն կխոստովանե՞ք, թե այս 131-ի մեջ կա՞ն արդյոք պատգամավորներ, որոնք ձեր ու ՆԳ եւ ԱԱ համակարգի շնորհիվ են ընտրվել։
-Նայած թե աջակցություն ասելով ինչ նկատի ունեք։ Այո՛, այո՛։ Ես իմ կարծիքն ասել եմ։ Բայց այստեղ չկա որեւէ մեկը, որին ոստիկանությունն ուժով ընտրած լինի։
– Իսկ ովքե՞ր են ձեր պատգամավորները։ Ասենք, «Օրինաց երկիրն» այդ ցանկո՞ւմ է, թե՞ ոչ։
-Ուրեմն, ինչքան էլ դու եւ քո գործընկերները, ձեր թերթն ինձ վերագրեն ցանկացած կուսակցություն, դա չի կպնի ինձ։
– Լավ էլ կպել է։
-Քո կարծիքով է կպել։ Չի կպնի այն առումով, որ դա մի օրվա, մի ամսվա բան չի։ Անցնելու է 2-3 ամիս՝ տեսնելու եք բոլորդ։ Եվ եթե քեզ, ձեր թերթին կամ ձեր գործընկերներին թվում է, որ ես ցանկացել եմ ընտրություններին մասնակցել ու չի ստացվել՝ խորապես սխալվում եք։ Եթե ես ցանկանայի մասնակցել այս ընտրություններին՝ կարծում եմ, բավականաչափ մեծ քանակով ձայներ կարող էի վերցնել, քանի որ ցանկացած ոստիկանապետի, եթե տրվեին այն ցուցումները, որ տրվել էին նախկինում՝ առնվազն մի քանի հազար ձայն յուրաքանչյուրը կարող էին վերցնել։ Ձեւերը շատ հայտնի են, իսկ իմ նպատակը դա չէր։ Նպատակս այն էր, որ այս ընտրությունները հավատ ներշնչեին։
– Շատ է խոսվում ձեր եւ Վազգեն Սարգսյանի միջեւ ազդեցության ոլորտների, չափի համար պայքարի եւ տարաձայնությունների մասին։ Պարզ է, որ հիմա ասելու եք, թե այդ լուրերն իրականությանը չեն համապատասխանում։
-Ոչ, ես ուրիշ բան եմ ասելու, որ ես չեմ ցանկանում ոլորտներ նվաճել։ Եվ ասելու եմ, որ եթե քեզ թվում է, թե ՆԳ եւ ԱԱ նախարարը չպիտի ազդեցություն ունենա որեւէ ոլորտի վրա, ապա խորապես սխալվում ես։ Հակառակ դեպքում ինչպե՞ս պիտի աշխատի այդ մարդը։
-Այնուամենայնիվ, Վազգեն Սարգսյանի հետ այդ հարցերում տարաձայնություններ կա՞ն։
-Ի՞նչ հարցերում։ Տարբեր հարցեր կան։ Ինչ ասեմ՝ Վազգենը մեկ-մեկ սիրում է գինի, ես՝ վիսկի, կամ էլ հակառակը։ Տարաձայնությո՞ւն է դա, թե՞ ոչ։
-Պատրա՞ստ եք աշխատել Վազգեն Սարգսյան վարչապետի ղեկավարությամբ։
-Իհարկե։
-Արծրուն Մարգարյանի սպանությունն այդպես էլ չի բացահայտվում, ինչո՞ւ, խոստացածի պես, հրաժարական չեք տալիս։
-Իսկ ո՞վ է ասել, որ չի բացահայտվում։ Բա ձեր թերթն էլ, բոլորն էլ գրեցին։ Բա այդպիսի հանգամանքներ բացահայտվեցին։ Բա այդպիսի փաստեր կան։ Էլ բացահայտումն ինչպե՞ս է լինում քո կարծիքով։
– Պաշտոնապես պիտի հայտարարվի, որ Արծրուն Մարգարյանի սպանությունը բացահայտվել է։
-Հարյուր անգամ պաշտոնապես բաներ ենք հայտարարել։ Բայց իմացիր, որ գոնե մեր պետության մեջ հանցագործությունների բացահայտումները գրանցվում են այն ժամանակ, երբ լինում են դատարանի որոշումները։ Շուտով գործը դատարան կգնա։ Ամբողջը հրապարակավ կլինի։ Նյութերը կտպագրվեն։ Ում կուզենաք՝ հարցեր կտաք։
– Այժմ դուք այլեւս մարդկայնորեն չե՞ք բացառում Արծրուն Մարգարյանի ինքնասպանությունը։
-Ո՛չ։
– Դուք համոզվեցիք, որ դա ինքնասպանությո՞ւն է։
-Հարյուր ձեւի ֆռռացնում ես, դե ինչի՞ համար։
Հարցազրույցը ֆռռացրեց
ԱՆՆԱ ԻՍՐԱՅԵԼՅԱՆԸ
