Հարգելի պատգամավորներ.
Շնորհավորում եմ ձեզ մեր ժողովրդի վստահության քվեն ստանալու եւ Ազգային ժողովի պատգամավոր ընտրվելու կապակցությամբ: Շնորհավորում եմ հատկապես համոզիչ հաղթանակ տարած «Միասնություն» դաշինքի անդամներին:
Ձեւավորվել է պրոֆեսիոնալ հիմունքներով աշխատող նոր Ազգային ժողով, որի պատասխանատվությունը երկրի ճակատագրի համար, անկասկած, շատ ավելի մեծ է:
Ակնհայտ է, որ չի կարող լինել շարունակական զարգացում եւ տեւական կայունություն առանց ժողովրդավարության հաստատման: Իսկ երկրի ժողովրդավարության հիմնական չափանիշը խորհրդարանի վիճակն է եւ նրա դերը հասարակական-քաղաքական գործընթացներում: Շատ բան պետք է արվի խորհրդարանի նկատմամբ ժողովրդի վստահության վերականգնման եւ միջազգային ասպարեզում նրա հեղինակության բարձրացման համար: Այսօր միջխորհրդարանական կապերը միջազգային հարաբերությունների կարեւորագույն մաս են կազմում, եւ մեծ չափով նաեւ ձեզանից է կախված միջազգային հանրության վերաբերմունքը Հայաստանի հանդեպ: Խորհրդարանն ըստ էության երկրի հավաքական քաղաքական նկարագիրն է:
Կարդացեք նաև
Մենք մտնում ենք հայկական պետականության զարգացման նոր փուլ: Արմատական փոփոխությունները պետական շինարարության, դատաիրավական համակարգի, շուկայական տնտեսության, մարդու իրավունքների հարցերի, անձի եւ խոսքի ազատության բնագավառներում դարձել են անշրջելի, եւ մենք միասին պետք է դրանք հասցնենք իրենց տրամաբանական ավարտին: Ժողովրդավարության հետագա խորացումը, ազատ շուկան, տնտեսական բարեփոխումների հետեւողական շարունակումը այլընտրանք չունեն: Այս ճանապարհին խորհրդարանի արդյունավետ աշխատանքը եւ կառուցողական դիրքորոշումը կարող են լրջորեն խթանել դրական գործընթացները: Իբրեւ արդյունք, Հայաստանը կարող է աշխարհին ներկայանալ որպես տարածաշրջանում ժողովրդավարական մնայուն արժեքների եւ կայունության առաջամարտիկ: Ամեն ինչ կախված է մեզանից եւ մեր պատասխանատվությունից: Հասարակական համաձայնությունը, քաղաքական երկխոսությունը եւ կառուցողական համագործակցությունը առաջիկա չորս տարիներին պետք է լինեն մեր ժողովրդի կարգախոսը:
Այսօր մեր առջեւ ծառացած խնդիրների լուծումը ես հնարավոր եմ համարում միայն օրենսդիր եւ գործադիր իշխանությունների սերտ համագործակցության պայմաններում: Երկրի տնտեսական վերելքը եւ ժողովրդի սոցիալական վիճակի բարելավումը մեծապես կախված են այդ համագործակցության արդյունավետությունից:
Հարգելի պատգամավորներ, կրկին շնորհավորելով ձեզ՝ նորընտիր Ազգային ժողովին մաղթում եմ հաջողություններ օրինաստեղծ գործունեության մեջ եւ արդյունավետ աշխատանք: Դժվարին, բայց պատվաբեր աշխատանք՝ ի շահ եւ ի բարօրություն մեր երկրի ու ժողովրդի:
Շնորհակալություն:
