Արտաշես Գեղամյանը հայտարարել էր, թե «Միասնության» ծրագիրը բարի ցանկությունների ցանկ է, որում համակարգված մոտեցում չկա, անհեռանկարային ծրագիր է, հանրապետությանը տանելու է փակուղի։ «Առավոտի» խնդրանքով մեկնաբանելով այդ հայտարարությունը, Կարեն Դեմիրճյանն ասաց. «Շատ նորմալ եմ վերաբերվում, քանի որ ամեն մարդ յուրովի է հասկանում իր կարդացածը, կարդացածից արած իր սեփական եզրակացություններն են»։ «Այսինքն, չե՞ք վիճարկում այդ գնահատականները» հարցին էլ պատասխանեց. «Ոչ, ես նորմալ եմ վերաբերվում նրա ընկալմա՛նը»։
ԴԵՄ Է, ԲԱՅՑ ԲԱԺԱՆՎԵԼՈՒ ԵՆ
«Այգ» հեռուստաընկերության թղթակցուհու հարցին, թե արդյոք ՆԳ եւ ԱԱ նախարարությունները տարանջատվելո՞ւ են, Սերժ Սարգսյանը պատասխանեց. «Երեւի։ Այո, ճիշտ է»։ «Ազատություն» ռ/կ-ի հարցին, թե արդյոք իր հետ զրուցել կամ բանակցել են այդ մասին, արձագանքեց. «Ես ընտրություններում հաղթանակած կուսակցության ղեկավար չեմ, որ ինձ հետ բանակցություններ վարեն։ Ես պետական պաշտոնյա եմ, իսկ նրանց հետ չեն բանակցում»։ Ավելի վաղ «Առավոտի» հարցին, թե ինչպիսի՞ն է ՆԳ եւ ԱԱ-ի տարանջատման վերաբերյալ իր դիրքորոշումը, Սերժ Սարգսյանը պատասխանել էր. «Ես թիթեռ չեմ, որ ամեն երկու ամիսը մեկ իմ տեսակետը փոխեմ, իսկ իմ տեսակետը բոլորիդ է հայտնի»։
Կարդացեք նաև
Կարդացեք նաեւ էջ 4։
ԻՍԿ ԲԱԳՐԱՏՅԱՆԸ ԿԶՈՂ Է
– Պարոն Գեւորգյան, ինչպե՞ս եք վերաբերվում նախկին վարչապետ Հրանտ Բագրատյանի ասածին, թե սա պպզողների խորհրդարան է։
«Առավոտի» այս հարցին Դավիթաշենի նախկին թաղապետ Ռուբեն Գեւորգյանը պատասխանեց. «Այդպիսի հայտարարություն անողները պարտության ցավի ներքո են նման բաներ ասում՝ որպես հոգու սփոփանք։ Իսկ փաստն ինքնին ասում է այն մասին, որ Բագրատյանն իր համախոհների հետ միասին կզողների շարքին է դասվել»։
