Երկուշաբթի Վերաքննիչ դատարանը քննարկելու է Աշոտ Բլեյանի փաստաբանների դիմումը՝ իրենց պաշտպանյալի խափանման միջոցը փոխելու վերաբերյալ։ Հիշեցնենք, որ Ա. Բլեյանի փաստաբան Տիգրան Ջանոյանը գտնում է, որ դատարանի որոշումը՝ որպես խափանման միջոց կալանք ընտրելը, անհիմն է։ Նույն կարծիքին է Աշոտ Բլեյանի պաշտպանության հասարակական խորհուրդը, որը երեկ հանդես է եկել համապատասխան հայտարարությամբ։
ՉԵՂՅԱԼ ԵՆ ՀԱՅՏԱՐԱՐՎԵԼ ՔՎԵԱՐԿՈՒԹՅԱՆ ԱՐԴՅՈՒՆՔՆԵՐԸ
Լոռու մարզի թիվ 53 ընտրատարածքում չեղյալ են համարվել ընտրությունները։ Նշենք, որ այս տարածքի պատգամավորության թեկնածու, Վարդաբլուրի գյուղապետ Վռամ Գյուլզադյանի վստահված անձը բողոք էր ներկայացրել Լոռու մարզային ընտրական հանձնաժողով, նշելով, որ քվեաթերթիկների մեծ մասը վավեր են ճանաչվել այն դեպքում, երբ դրանք եղել են անվավեր։
Կարդացեք նաև
ԲՈՆԱՊԱՐՏԸ ՀԱՂԹԵՑ
Երեկ ԿԸՀ-ն որոշեց, որ թիվ 22 ընտրատարածքում այնուամենայնիվ հաղթել է ոչ թե ՀԺԿ-ի պաշտպանյալ Համլետ Հակոբյանը, այլ «Իրավունք եւ միաբանություն» դաշինքի ամենահայտնի գործիչ, ազատ ձեռներեց Նապոլեոն Ազիզյանը։ Նախորդ օրն «Առավոտը» գրել էր, թե մեր այս ԱԺ-ի պատկերն ամբողջացնելու համար միայն Նապոն է պակասում։ Արձանագրենք. պատկերն այլեւս ամբողջական է։
ԴԱԴԱՐ
Ընտրությունների շրջանում ՀՀՇ-ի պաշտոնաթերթ «Հայքը» երկօրյա դարձավ եւ թերեւս սա ֆինանսական խնդիրներ առաջացրեց։ Համենայնդեպս, «Առավոտին» հասած տեղեկություններով «Հայքի» այսօրվա համարից հետո թերթը երկու ամսով դադարելու է լույս տեսնել։
