Ազգային ժողովի այս ընտրություններում մասնակցած 21 կուսակցություններից եւ դաշինքներից 9-ը չեն հատել նույնիսկ 1%-ի պատնեշը, իսկ 3 կուսակցությունների հաջողվել է անցնել «հաղթական» 1%-ը։ Այս տվյալներն, իհարկե, մայիսի 31-ի ԿԸՀ-ի հրապարակած տվյալներն են։ Մինչ կհրապարակվեն ԿԸՀ-ի վերջնական տվյալները, որոշեցին իմանալ պարտված կուսակցությունների գնահատականն ընտրությունների վերաբերյալ։
«Կոմունիստական եւ սոցիալիստական կուսակցությունների միություն» դաշինքում (1,68%) ընդգրկված Հայաստանի առաջադիմական միացյալ կոմունիստական կուսակցության ներկայացուցիչ Ռոբերտ Հովսեփյանը հայտնեց, որ իրենց դաշինքը դեռեւս ընտրության օրը հանդես է եկել հայտարարությամբ, երբ դեռ հայտնի չեն եղել տվյալները։ Համաձայն այդ հայտարարության «Կոմունիստական եւ սոցիալիստական կուսակցությունների միություն» դաշինքն անհանդուրժելի է համարում այն հանգամանքը, որ ընտրությունների 10%-ը զրկվել է ընտրելու հնարավորությունից։ Ուստի այդ հայտարարությամբ կոչ են արել. հրավիրել արդեն նախկին ԱԺ արտահերթ նիստ, որը եւ նոր ընտրություններ կնշանակի։ «Ամոթ է». մեկ բառով գնահատեց այս ընտրությունները Հայաստանի սոցիալ դեմոկրատական կուսակցության նախագահ Ա. Մարտիրոսյանը (կուսակցությունը «Սոցիալիստական ուժերի միություն» դաշինքի (0,32%) անդամ է)։ «ԱԺ ընտրություններն անցկացրին ինչպես ցանկանում էին։ Նորմալ ընտրություններ անցկացնելու համար պետք է 5-6 ամիս առաջ կադրային փոփոխություններ կատարեին տեղական ինքնակառավարման մարմիններում։ Դա չարվեց, տեղական մարմիններն էլ սաբոտաժի ենթարկեցին ընտրությունները»։
«Ազատ Հայք Առաքելություն» (0,4%) նախագահ Ռ. Մնացականյանը մինչեւ արդյունքների պաշտոնական հրապարակումը չցանկացավ որեւէ գնահատական տալ։ Նրա կարծիքով ցուցակների անկատարության պատճառով մեկ միլիոնից ավել մարդ չի կարողացել մասնակցել ընտրություններին։
Լ. Մ.
