«Ընտրական օրենսգիրքն» արգելում է քվեարկության նախորդ օրը քարոզչություն կատարել։ Եվ եթե հրապարակեինք այն պատգամավորության թեկնածուների անունները, որոնց կատարած զանցանքների մասին մեր ընթերցողները երեկ մեզ հայտնում էին հեռախոսով՝ կարող էինք հակաքարոզչության համար պատասխանատվության ենթարկվել։ Ուստի, բավարարվենք այսպիսի ձեւակերպումներով։ Գավառից մի խումբ զայրացած կոմունիստներ «Առավոտին» հայտնեցին, թե թեկնածուներից մեկը «գազ ու ջուր է քաշում, կաշառում է մարդկանց՝ 5 դոլարի դիմաց անձնագրերի համարներ արտագրելով»։ Խնդրում էին նախագահին միջոցներ ձեռնարկել, օտարերկրյա դիտորդներին՝ այցելել Գավառ։
ՕՐԵՆՔԸ ՉԵՆՔ ԽԱԽՏՈՒՄ-2
Բալահովիտցի մի ընթերցող «Առավոտին» հայտնեց, որ օդանավակայանի աշխատակիցներն օգտագործվում են պատգամավորության թեկնածուներից մեկի քարոզարշավը կազմակերպելու համար։ Եվ ասածն ապացուցելու համար փոխադրումների ծառայության, մատակարարումների բաժնի պետի անունը տվեց, հիշեցնելով, որ «Ընտրական օրենսգրքի» 18-րդ հոդվածի համաձայն պետական մարմինների աշխատակիցներին արգելվում է նախընտրական քարոզչություն կատարել։
Կարդացեք նաև
ԳՐԱԶԸ ԿՐՎԵՑ
-Իմ դեմ մրցակից չկա,- «Առավոտին» ասաց պատգամավորության մի թեկնածու,- միակ պրոբլեմս այն է, որ Սերժ Սարգսյանը իմ մրցակիցների շտաբի պետն է։
Այս հայտարարությունից հետո, թեկնածուն որոշեց գրազ գալ, թե «Առավոտը» իր այս ասածը չի կարող տպագրել։ Հակառակ նրա պատկերացրածի, «Առավոտը» գրազ չեկավ, բայց տպագրում է ասածը։
