Հենց նոր էր Դիլիջանի «Իմպուլս» գործարանի դիմաց Ռոբերտ Քոչարյանը ծառ տնկել, երբ մի պառավ կին փութով նրա ձեռքից վերցրեց բահը, ասելով, թե իրենն է՝ իր այգուց են բերել։ Նախագահն արդարացավ. «Ուզում էի փորձեմ, տեսնեմ՝ կարողանում եմ բահ բռնել»։ Այդ կինն իր բահը կրծքին սեղմած հեռանում էր, բայց այսուհանդերձ ասաց. «Կարաս, կարաս, խի՞ չես կարա։ Բա Ղարաբաղի ծառերն ո՞վ ա տնկել»։
Կարդացեք նաեւ՝ 4-րդ էջ։
ԲԼԵՅԱՆՆ ԱԶԱՏ ԿԱՐՁԱԿՎԻ՞
Կարդացեք նաև
Փաստաբան Տիգրան Ջանոյանը համակարգում է Աշոտ Բլեյանի դատապաշտպանների խմբի աշխատանքները, եւ նրանք պատրաստվում են Վերաքննիչ դատարան դիմել՝ Բլեյանի խափանման միջոցը վերանայելու խնդրով։
«ՃՇՏՈՎ»
«Առավոտի» ունեցած տեղեկություններով, «Բազալտ» ԲԲԸ աշխատակիցների հետ հանդիպման ժամանակ թիվ 18 ընտրատարածքի պատգամավորության թեկնածու, «Կրեդիտ-Երեւան» բանկի նախագահ Մարտին Հովհաննիսյանն առաջարկել է, որ «ճշտով» իրենց ձայները տան առաջին հերթին՝ «Միասնությանը», հետո՝ «Հզոր հայրենիքին» կամ, ծայրահեղ դեպքում՝ ԱԻՄ-ին։ Ի դեպ, երեքն էլ հանձնաժողովներում իրենց տեղերը զիջել են Մարտին Հովհաննիսյանին։
ԲԱԼԸ ԹԱՆԿ Է
Լոռվա բոլոր մարզպետներն ունեցել են Երեւանի համարով հեռախոս։ Սակայն, ինչպես տեղեկացանք ներկայիս մարզպետ Հենրիկ Քոչինյանի օգնականից, երեւանյան հեռախոսը հանվել է, որովհետեւ մարզպետարանը փող չունի։
ՉՄՈՌԱՆԱՔ ՀԱՆԿԱՐԾ
Այս տարի էլ առավել մոռացկոտներին կուղարկվեն հիշեցման թերթիկներ, որոնք մեկ անգամ եւս կավետեն (կամ կգուժե՞ն) քաղաքացիներին, որ մայիսի 30-ին պարտք ունեն կատարելու։ Սակայն խմբագրություն զանգահարող բազմաթիվ քաղաքացիներ մեզ հայտնում են, որ նման ծանուցագիր չեն ստացել։
