ՀՀ Ազգային ժողովի պատգամավորների ընտրարշավը, ընդհանուր առմամբ անցնում է ՀՀ օրենքների պահպանման մթնոլորտում։ Այդուհանդերձ, վերլուծելով կատարված խախտումների մասին ստացված ահազանգերը եւ առաջնորդվելով ընտրությունների օրինականության ու բնականոն ընթացքը ապահովելու մտահոգությամբ, ՀՀ գլխավոր դատախազությունը նշում է, որ անհրաժեշտ է խստորեն պահպանել ՀՀ Ընտրական օրենսգրքի 18-23 հոդվածներով ամրագրված նախընտրական քարոզարշավի դրույթները եւ բացառել իրավախախտումները։ Մասնավորապես պատգամավորության թեկնածուները, համամասնական կարգով ընտրություններին մասնակցող կուսակցությունները եւ կուսակցությունների դաշինքները հետեւելով օրենքի պահանջներին պետք է զերծ մնան օտարերկրյա քաղաքացիներին ու կազմակերպություններին, բարեգործական եւ կրոնական կազմակերպություններին նախընտրական քարոզարշավին մասնակից դարձնելուց եւ նմանաբնույթ այլ խախտումներից։ Անհրաժեշտ ենք համարում ընդգծել, որ ՀՀ Ընտրական օրենսգրքի 139 հոդվածի 24 կետի համաձայն՝ «նախընտրական քարոզչություն կատարելու իրավունք չունեցող անձանց եւ կազմակերպությունների կողմից նախընտրական քարոզչություն կատարելը եւ ցանկացած բնույթի քարոզչական նյութ տարածելը» պատասխանատվություն է առաջ բերում, որը նախատեսված է ՀՀ վարչական օրենսգրքի 401 հոդվածով։ ՀՀ գլխավոր դատախազությունը տեղեկացնում է, որ ՀՀ օրենսդրության պահանջները չկատարող անձանց եւ կազմակերպությունների առնչությամբ հանրապետության դատախազական մարմինների կողմից կձեռնարկվեն հակազդման համապատասխան միջոցներ։
ՀՀ գլխավոր դատախազության հասարակական կապերի եւ լրատվության բաժին
