Ինչպես միշտ, այս շաբաթ էլ պրն Գեղամյանը նախընտրական հանդիպումների ժամանակ արիաբար պահանջեց ՀՀՇ-ականների արյունը: Ինչպես միշտ, ներկա գտնվողները ոռնում էին հրճվանքից ու հաճույքից՝ սոված-ծարավ ժողովրդին թշնամու կերպար է պետք: Եթե որեւէ մեկին, ասենք՝ ինձ, դուր չեն գալիս արնածարավ ելույթները, ապա դա ամենեւին չի նշանակում, թե ինձ դուր է գալիս ՀՀՇ-ն: Երախտապարտ կլինեմ, եթե որեւէ մեկը բացատրեր, թե ինչով է պրն Գեղամյանը ՀՀՇ-ից լավը կամ վատը: Բոլշեւիկյան անհանդուրժողականությամբ տոգորված մեր ողջ քաղաքական դաշտը միասեռ է:
Ջեմմա Անանյանը
Մինչ արական սեռի ներկայացուցիչները նազուտուզ են անում, երբ լրագրողներն իրենց հարցնում են, թե ինչու են հանել իրենց թեկնածությունները՝ հրաժարվելով ընտրապայքարից, տիկին Անանյանը հիրավի տղամարդկային շիտակությամբ պատասխանեց՝ որովհետեւ ինձ պաշտոն են տալիս: Հուսանք՝ տարածքային կառավարման փոխնախարարի պաշտոնում տիկին Ջեմման նույնքան շիտակ կլինի:
Կարդացեք նաև
Կուսակցական թեկնածուները
Ջանասիրաբար կուրծք ծեծող եւ սեփական անարատությամբ ընտրողներին շլացնող կուսակցական գործիչները մեջլիս են դուրս եկել՝ մրցելու, թե ով է ավելի շուտ եւ ավելի խիստ ձեւով առաջարկել վերացնել պատգամավորների անձեռնմխելիությունը: Իբր՝ տեսեք, ինչպիսի «քրեազերծ» տղաներ ենք մենք, որ մեզ ոչ մի տանիք էլ չի պահանջվում: Որպես նախընտրական քարոզչություն դա հոյակապ է հնչում: Սակայն հունիսի ընթացքում կարող եմ գրազ գալ ցանկացած պատգամավորի հետ. եթե անձեռնմխելիությունը վերացնելու մասին օրենքը սկզբնական շրջանում նույնիսկ ընդունվի, ապա ամենաշատը մեկ տարի հետո այն կվերանայվի, եւ կվերականգնվի պատգամավորների ներկայիս կարգավիճակը:
ԱՐԱՄ ԱԲՐԱՀԱՄՅԱՆ
