Ի պատասխան թերթի երեկվա համարում տպագրված «ՀՀ սուրհանդակային ծառայության վաստակավոր աշխատակից Ալեքսան Համբարձումյանի» նամակի (այդպես էր ներկայացել նամակագիրը), վարչապետի աշխատակազմի ղեկավար Աշոտ Մանուկյանը թերթին հայտնեց, որ այդպիսի անուն-ազգանունով Երեւանում գոյություն ունի երեք հոգի, սակայն ոչ մեկը չի ապրում Թումանյան փողոցում, չի աշխատել սուրհանդակային ծառայությունում եւ չի կարող առնչություն ունենալ նամակում շարադրված պատմությունների հետ, որոնք, ըստ պրն Մանուկյանի, ծայրից ծայր հնարած են։
Նախկին սուրհանդակ Ալեքսան, բացահայտվի՛ր։ Հակառակ դեպքում խմբագրությունը հակված կլինի ենթադրել, որ դու պարզապես «մատերիալ գրող ես»։
ՍԱԿԱԳՆԵՐԸ ՉԵՆ ԲԱՐՁՐԱՆԱ
Կարդացեք նաև
Երեկ «Առավոտի» խմբագրություն զանգահարեց ՀՀ էներգետիկ հանձնաժողովի նախագահ Վարդան Մովսիսյանը եւ, հակադրվելով մեր թերթին հարցազրույց տված պատգամավոր Արմեն Կիրակոսյանին, հայտնեց, որ մինչեւ այս տարվա վերջը էլեկտրաէներգիայի սակագները չեն բարձրանա։
Կապրենք՝ կտեսնենք։
ԳԱՐՈՒՆ Ա, ՁՈՒՆ Ա ԱՐԵԼ
Մի խումբ գյուղապետերի եւ քաղաքապետերի ներկայությամբ Դիլիջանի քաղաքապետը հայտնեց, որ իրենց քաղաքում ձյուն է նստած (մայիսի 19-ի դրությամբ)՝ համընդհանուր զարմանք հարուցելով։ Հետո շրջվելով դեպի «Առավոտի» թղթակիցը, եւ բոլորին դիմելով ասաց.
-Հիմա «Առավոտը» կգնա-կգրի, որ Դիլիջանի քաղաքապետը լավ չի աշխատել, դրա համար այնտեղ ձյուն է եկել։
Բայց մենք, իհարկե, այդպես չէինք գրի։ Մենք կարձանագրեինք, որ պարոն քաղաքապետը շատ ավելի վատ է աշխատել՝ ծառերին չի հրամայել չծաղկել եւ չբողբոջել, մինչեւ էս ուշացած ձյունն էլ գա-գնա։
