Նախորդի եւ ներկայի համեմատության դեպքում, ժողովրդական խոսքի համաձայն, նախապատվությունը տրվում է նախորդին։ Ժողովուրդը՝ չգիտենք, բայց նախկին եւ ներկա ԿԸՀ-ների անդամ Վահե Վարսանյանը դրանց համեմատության հարցում հետեւեց առածին եւ հրապարակավ էլ հայտարարեց այդ մասին։ Նախորդ ԿԸՀ-ի նախագահ Խաչատուր Բեզիրջյանից փորձեցինք պարզել նրա կարծիքը ներկա ԿԸՀ-ի մասին։
– Ճիշտն ասած, ես այդքան մոտիկից տեղյակ չեմ. վերջերս 10 օր քաղաքից բացակայել եմ։ Բայց իմ կարծիքով մեծ մասը նախկիններն են, փորձը կա։ Ընդհանուր առմամբ՝ դրական։
– Իսկ ինչպե՞ս եք վերաբերվում այն հանգամանքին, որ վերջին երկու ԿԸՀ-ների անդամ Վահե Վարսանյանը բացասական է գնահատել ներկայինի աշխատանքը։
– Քանի որ բացակայել եմ, գործեր շատ կային դպրոցում, շատ չեմ առնչվել այդ հարցերին։
Կարդացեք նաև
– Իսկ տեղյա՞կ եք, որ պրն Վարսանյանը ընդդեմ ԿԸՀ-ի հայց է ներկայացրել դատարան։
– Լրատվական գործակալություններից տեղյակ եմ, բայց Վահեի հետ չեմ շփվել։ Չեմ խորացել պրոբլեմի մեջ։
– Ձեզ չի՞ հետաքրքրում այդ, չի՞ անհանգստացնում, թե ինչ է տեղի ունենում ձեզնից հետո։
– Շատ հետաքրքրում է, բայց ուղղակի ժամանակի սղության պատճառով չեմ հասցնում։ Կառավարման դպրոցում բավական կուտակվել էին գործերը։
– Ինչքանո՞վ է ճիշտ, որ ԿԸՀ անդամը դատի է տալիս ԿԸՀ-ին։
– Իրավական տեսակետից ճիշտ է, իրավունք ունի։ Բայց ինձ թվում է, գեղեցիկ չի։ Կարող էր իր կուսակցությունը դատի տալ եւ ոչ թե ինքը։ Իրավական խոչընդոտ չկա, էթիկայի խնդիր է։
– Իսկ սա ունի՞ իր նախադեպը։ Եղե՞լ է նման բան։
– Ես չեմ հիշում։
Ա. ԳՐԻԳՈՐՅԱՆ
