Քաղաքական խորհրդի վերջին նիստին մասնակցած կուսակցություններից մեկի ներկայացուցիչն «Առավոտին» պատմեց, որ երբ իրենք մտահոգություն են հայտնել տեղամասային հանձնաժողովների տեղերի առուծախի վերաբերյալ, Ռոբերտ Քոչարյանն ասել է, թե ինքն էլ ունի նման տեղեկատվություն։ Նաեւ ուշադրություն է հրավիրել, թե ինչպես ձեռքներն ընկած առաջին իսկ առիթից, հնարավորությունից օգտվելով որոշ կուսակցություններ սկսեցին առեւտուր անել։ «Բա այդ մարդիկ որ պետական պաշտո՞ն ունենային՝ ի՜նչ կանեին»,- ասել է նախագահը։
ԱՊԱՏԵՂԵԿԱՏՎՈՒԹՅԱՆ ՆՄՈՒՇ-1
«Դատարկ խոսակցություններ են»,- կարճ ու միանշանակ պատասխանեց թիվ 5 ընտրատարածքի պատգամավորության թեկնածու Լեոնիդ Հակոբյանը, երբ փորձեցինք նրա վերաբերմունքը պարզել քաղաքական շրջանակներում պտտվող այն լուրերի նկատմամբ, թե իրեն ինչ-որ պաշտոն են առաջարկել, բայց այն պայմանով, թե մինչեւ վերջ կմրցակցի Կիմ Բալայանի հետ։ Սա դիտվում էր Վազգեն Սարգսյան-Սամվել Բաբայան լարված փոխհարաբերությունների շրջանակում, քանի որ Կիմ Բալայանը բավական մտերիմ է ԼՂՀ պաշտպանության նախարարի հետ։
Կարդացեք նաև
ԱՊԱՏԵՂԵԿԱՏՎՈՒԹՅԱՆ ՆՄՈՒՇ-2
ՀՀՇ շրջանակներում տարածված համոզում էր, թե վարչությունում աշխատանքները դադարեցրած թեւն է իրականում պառակտում կազմակերպությունը, քանզի Բաբկեն Արարքցյանը նախ չի ցանկացել գլխավորել ՀՀՇ համամասնական ցուցակը, հետո էլ մերժել է կազմակերպությունը համանախագահությամբ ղեկավարելու Վանո Սիրադեղյանի առաջարկը։ Ի պատասխան «Առավոտի» հարցի, Բաբկեն Արարքցյանը կտրուկ հերքեց, թե իրեն նման առաջարկներ են արվել։
