Երբ թիվ 1 դաշնակցական Վահան Հովհաննիսյանը բողոքում էր, թե «կա մի քաղաքական շրջանակ, որը ամեն կերպ ցանկանում է դաշնակցության դեմ պատնեշներ ստեղծել», հաստատ երկրային ուժերին նկատի ուներ։ Բայց երեկ երկնային ուժերն էլ էին «թարսվել» դաշնակցականների հետ՝ ձախողելով Մայր բուհի 80-ամյակին նվիրված դաշնակցական համերգը, որ «Նիկոլ Աղբալյան» ուսանողական միությունն էր կազմակերպել։ Ու չնայած բանտերով ու աքսորավայրերով անգամ դաշնակցականներին չես վախեցնի, բայց եղանակի քմահաճույքը (թե՞ նախասիրությունը) հարգեցին, ու համերգը, ամենակարեւորը՝ Վահան Հովհաննիսյանի ելույթը, հետաձգվեց։
ՊՈԿՎԵՑ ԽՈՍՐՈՎԻ ՏԱՆԻՔԸ
Մայիսի 17-ի ուժգին քամին չարագուշակ էր Ազգային ժողովի համար։ Նախ, մի քանի թիթեղ պոկվեց տանիքից եւ համարյա միաժամանակ տապալվեց ԱԺ շենքի աջ հատվածում գտնվող մի ծառի կեսը։ Հայտնի է, որ այգին Խոսրովի անտառ են կոչում, իսկ ԱԺ տանիքը՝ Խոսրովի տանիք։ Ստացվում է, որ անտառն ու տանիքը վնասված են, բայց արմատները դեռեւս ամուր են։
Կարդացեք նաև
ԳՈՎԱԶԴ՝ ՈՉ ԹԵ ՓՆՈՎԱԶԴ
«Առավոտի» մայիսի 11-ի համարում տպագրված էր Դավիթաշենի թիվ 7 ընտրատարածքում պատգամավորության թեկնածու Համլետ Հովսեփյանի նախընտրական վճարովի գովազդը։ Չնայած դրա բովանդակության համար ամբողջապես պատասխանատու է գովազդատուն, ցավով նշում ենք, որ գովազդի անվան տակ պրն Հովսեփյանը զետեղել է հակաքարոզչություն՝ նույն ընտրատարածքում քվեարկվող իր մրցակից Ռուբեն Գեւորգյանի դեմ։ Իրավաբան Համլետ Հովսեփյանին հիշեցնենք, որ գովազդը ենթադրում է սեփական բարեմասնությունների նկարագրություն, ոչ թե մրցակցի վարկաբեկում։
ՆՈՐ ՔԱՂԱՔԱՊԵՏ, ԲԱՅՑ ՇԱՏ ԲՈՂՈՔՆԵՐ
Իջեւանում տեղի են ունեցել քաղաքապետի ընտրություններ եւ արդեն հայտնի է հաղթողը՝ Վարուժան Ներսիսյան։ Սա, իբրեւ ընտրական պրոցես, աննախադեպ ընթացք է ունեցել։ Ընտրությունների օրը՝ ժամը 16-ին, արդեն շուրջ 600 դիմում-բողոք է հասցեագրված եղել դատական մարմիններին, որ այս կամ այն շենքն ընդգրկված չէ ցուցակներում եւ այլն:
ՊԱՇՏՊԱՆՈՒՄ Է, ՉԻ ՊԱՇՏՊԱՆՈՒՄ
ԱԻՄ-ի գրասենյակից «Առավոտին» հայտնեցին, որ Սյունիքի թիվ 70 ընտրատարածքում կուսակցությունը չի պաշտպանում ո՛չ Սամվել Հարությունյանի, ո՛չ էլ որեւէ այլ հավակնորդի թեկնածությունը։ Նույն աղբյուրը հայտնեց նաեւ, որ Երեւանի թիվ 20 ընտրատարածքում ԱԻՄ-ը աջակցում է իր ամենաարժանավոր անդամ Գեւորգ Միրզոյանին։
Սեփ. լր.
ՈՒՂԵՐՁ ՍԻՍԻԱՆՑԻՆԵՐԻՆ
ՀՀ Ազգային ժողովի առաջիկա ընտրություններին միասնական կամք դրսեւորելու, համախմբվելու որոշում է կայացրել «Սիսիան համայնք» հասարակական կազմակերպության խորհուրդը։ Ձեզ ենք ուղղում մեր կոչը՝ ակնկալելով աջակցություն։
Մտահոգ մեր բնօրրանում լուծման սպասող բազում խնդիրներով՝ սիսիանցիներս համոզված ենք, որ ապագա խորհրդարանում մեր ձգտումների, կամքի արտահայտման լավագույն կրողը «Միասնություն» նախընտրական դաշինք է։
«Սիսիան համայնք» հասարակական կազմակերպության խորհուրդ
