ԱԺՄ վարչության մասնաշենքում երեկ սովորական նախընտրական եռուզեռ էր։ Օրվա երկրորդ կեսին Երեւանի ընտրական տեղամասային շտաբների պատասխանատուների հավաք էր։ Հավաքը, բնականաբար, մամուլի համար փակ էր։ Մյուս սենյակներում շարքային աշխատակիցներ էին, որոնք, ինչպես բոլոր նախընտրական շտաբներում, որեւէ հարցի չէին պատասխանում։ Բոլոր շտաբներում էլ նրանք անգամ «ժամը քանիսն է» հարցին չեն պատասխանում Զոյա Կոսմոդեմյանսկայայի համառությամբ։ ԱԺՄ-ի շտաբն էլ բացառություն չէր։ Տեղեկատվություն հայտարարելու ընդունելի բոլոր մեթոդներով հնարավոր եղավ պարզել հետեւյալը.
-ԱԺՄ կուսակցության ծրագրի տպաքանակը քչություն էր անում՝ շրջաններից եկած բոլոր խնդրատուները ձեռնունայն էին վերադառնում։
-ԱԺՄ քարոզչական մեքենան անմնացորդ շահագործում է իր լիդերներին՝ բոլոր թեկնածուների բուկլետները կրում են Վ. Մանուկյանի, Ա. Սադոյանի, վերջինս համարյա ամեն օր աջակցողական հանդիպումներ է ունենում ԱԺՄ-ական թեկնածուների ընտրողների հետ (երեկ հանդիպումը կայանալու էր Նոր Նորքի թիվ 17 ընտրատարածքում)։
-Երկուշաբթի բրիֆինգ են տալու Շավարշ Քոչարյանը եւ Վահե Վարսանդյանը։
Կարդացեք նաև
-Ընտրական տեղամասերի շտաբների պատասխանատուների հավաքից հետո սրահի սեղաններին «Ջերմուկի» եւ «Fanta»-ի դատարկ շշեր էին։ ԱԺՄ-ականները երեւի որպես ազգայիներ «Ջերմուկ» են խմում, որպես ժողովրդավարներ՝ «Fanta»։
Ա. Գ.
