Տպագրող կազմակերպության եւ տպաքանակի վերաբերյալ քարոզչական նյութերում տվյալներ չնշելու համար երեւի չեն ազատազրկի։ Այնուամենայնիվ, զարմանալի է, որ թեկուզ նման մանր օրինախախտում կատարողը մի կուսակցություն է, որը ղեկավարում է ԱԺ պետաիրավական հանձնաժողովի նախագահ, իրավաբանական գիտությունների դոկտոր Արթուր Բաղդասարյանը։ Մի կուսակցություն, որ տեղի-անտեղի անընդհատ նշում է, թե շումերները Հայաստանը «Սուրբ Օրինաց երկիր» էին անվանում։ Ավելի մանրամասն՝ հաջորդ համարում:
ՄԻ՞ԹԵ
Վերջին շրջանում շատ ավելի ինտենսիվ են շրջանառվում այն լուրերը, թե հնարավոր է արտգործնախարար Վարդան Օսկանյանի հեռացումը նոր խորհրդարանի կազմավորումից հետո։ Խոսակցություն կա, թե արտգործնախարար կարող է նշանակվել Մեծ Բրիտանիայում Հայաստանի դեսպան, նախկին վարչապետ Արմեն Սարգսյանը։ Հավակնորդների շարքում նշվում է նաեւ Խոսրով Հարությունյանի անունը։
Կարդացեք նաև
ՈՉ ՄԻ ՕՐ՝ ԱՌԱՆՑ ԱՂԱՍՈՒ
Աջափնյակի թիվ 2 ընտրատարածքի պատգամավորության թեկնածու Աղասի Արշակյանի բուկլետում նշված է, թե նա «արատավորող եւ ստրկացնող կապեր չունի»։ Նախընտրական ծրագրի հիմնադրույթներից են՝ «Բացահայտ, թե ծպտյալ՝ ոչ մի ՀՀՇ-ական Ազգային ժողովում», «Անվճար ուսուցում, անվճար բուժ. սպասարկում»։ Նրանց համար, ովքեր կկասկածեն, թե ինչպես է սա իրականացնելու Աղասին, բուկլետում կա նաեւ պատասխանը՝ ստրկանալով… կներեք՝ «ինտեգրվելով նոր միության կազմում»։
ՎՏԱՆԳՎԱԾ ԸՆՏՐՈՒԹՅՈՒՆՆԵՐ
«Ընտրական կեղծիքներն արդեն սկսված են, եւ այսօր արդեն կարելի է ասել, որ ընտրությունները չեն կարող ազատ եւ արդար լինել»,- ասում է ԱԺ պատգամավոր, թիվ 40 ընտրատարածքում պատգամավորության թեկնածու ՀՀՇ-ական Դավիթ Մելիքյանը։
Դավիթ Մելիքյանի հետ հարցազրույցը՝ «Առավոտի» հաջորդ համարում։
