Թերեւս այդպես կարելի է թարգմանել իմիջմեյքըր բառը։ Մայիսի 12-ի հեռուստաքարոզարշավին հետեւելով կարող ենք պնդել, որ եթե սույն ոչ ազգային զբաղմունք ունեցող մարդիկ ընդգրկվեին հայկական ընտրարշավում, նրանք խորհուրդ կտային՝
… Վազգեն Սարգսյանին, որ եթե, այնուամենայնիվ, չի սափրվելու, գոնե հեռուստախցիկի առջեւ ատամները չմերկացնի եւ քիթը կնճռոտելով դեմքին այնպիսի ահարկու արտահայտություն չտա, որ ենթադրվի, թե խորհրդանշում է վայրենի, անափ եւ կատաղի լիբերալիզմը։ Նման դիմարտահայտությամբ նաեւ դժվար է համոզել, թե մեզ բարի ընտրություններ են սպասվում։
… Կարեն Դեմիրճյանին, որ չկրկնի անցած ընտրությունների իր նույն ելույթները եւ անընդհատ ասի, թե հերիք է ծնկաչոք մնանք, ժողովուրդը պիտի մի բռունցք դառնա եւ այլն։ Ի վերջո, նախագահական ընտրությունների թեզերը խորհրդարանական ընտրություններում կրկնելը նպատակների շուրջ բավական մտորելու տեղիք է տալիս։
… Ֆիլարետ Բերիկյանին, որ եթե ռեժիսորական եւ օպերատորական վարպետության շնորհիվ նա բավական շահեկան է երեւում, թող փորձի նաեւ այդ տեսքին համեմատ լավ խոսել եւ, մասնավորապես «նախագահ» բառն արտասանելիս վերջին «հ»-ն անընդհատ կուլ չտալ։ Ի դեպ, այս սխալը շատերն են անում։
Կարդացեք նաև
… ՀՀՇ-ին, որն ինչ-որ «տերմինատորի» ցուցադրելը, որն երկրագունդն է շարժում՝ ընտրողների մոտ միայն տարակուսանքի զգացում կարող է առաջացնել, թե ինչ կապ ունի դա տվյալ կուսակցության հետ մասնավորապես եւ ընտրությունների հետ՝ ընդհանրապես։
… «Օրինաց երկրին», որ չարժե մարդկանց թյուրիմացության մեջ գցելով ներկայացնել, թե այս կուսակցությունը 20-ից ավելի օրենսդրական նախաձեռնություններ է ներկայացրել։ ԱԺ-ում եւ ոչ մի օրենսդրական նախաձեռնություն չի եղել, որի տակ «Օրինաց երկիր» ստորագրությունը լիներ։ Ներկայացվել են անհատ պատգամավորներ Արթուր Բաղդասարյանի, Սերգեյ Երիցյանի եւ այլոց մշակած օրինագծերը։
