Գեղարքունիքի մարզի Ներքին Գետաշենի գյուղապետ Աբով Գրիգորյանից գյուղացիներն իրենց դժգոհությունը այս էլ քանի տարի է արտահայտում են ՀՀ կառավարության շենքի մոտ։ Միտինգների համար այս աշխարհագրական վայրը գյուղացիները պատահական չեն ընտրել. ըստ Աբով Գրիգորյանի՝ իր հովանավորն ու «տանիքը» նստում է այս շենքում եւ նրա անունը Դավիթ Զադոյան է։ Գյուղացիները ձայնագրիչս տեսնելով եւ միմյանց ընդհատելով սկսեցին իրենց գյուղապետի ապօրինությունների շարքը. «Սոցապ բաժնում յուրացրել է 21 մլն 500 հազար դրամ, ապա գյուղապետ նշանակեցին, ապօրինի վաճառեց գյուղի 14 հեկտար հողերը։ Այսքանով չբավարարվեց, մնացած հողերի յուրաքանչյուր «կլետկան» վաճառում է 5-7 հարյուր դոլարով։ Մենք կառավարությանը բողոքել ենք, սակայն ոչ մի որոշում այստեղ չեն կայացրել»։ Գյուղացիները կառավարությունից հետեւյալն են պահանջում. «Էդպիսի անբարոյական գյուղապետին թող ձերբակալեն ու քրեական պատասխանատվության ենթարկեն, ինչքան կարելի է ճնշել անմեղ գյուղացուն»։
Տարածքային կառավարման եւ օպերատիվ հարցերի նախարար Դավիթ Զադոյանը երեկ ընդունել է գյուղացիներից մեկ-երկուսին եւ խոստացել, որ մինչեւ հինգշաբթի Աբով Գրիգորյանն այլեւս Ներքին Գետաշենի գյուղապետ չի լինի։ Նրան կփոխարինի մեկ ուրիշը։ Գյուղացիներին այս միտքը շատ չոգեւորեց. համոզված չէին, որ ալան-թալանը չի շարունակվի։ Բայց դե իրենց էլ «նախարար մարդ էր» ընդունել։ Այդ օրվա արդյունքից գոնե գոհ էին։
Լ. Ա.
