ՀՀ նախագահ Ռոբերտ Քոչարյանը երեկվա իր ասուլիսում զարմացել էր, որ ՀՀՇ-ի նախագահ Վանո Սիրադեղյանին օդանավակայանում այնպես էին եկել դիմավորելու, կարծես Քրիստոսին են դիմավորում։
Նախագահը, կարելի է ասել, դիպուկ էր նկատել։ Երեկ, ուշ երեկոյան, մոտ 100 հոգի ՀՀՇ վարչության շենքից շարժվեցին դեպի ՆԳ եւ ԱԱ նախարարություն։ Երթը կարելի էր եւ ավելի վաղ սկսել, եթե մասնակիցների նպատակը գիշերվա մեջ հարյուրավոր մոմեր վառելը չլիներ։ «Վա՜-նո, Հա-յաս- տան», «Ա-զա-տու-թյուն» վանկարկելով՝ երթի մասնակիցները մեկ շարքով կանգնեցին կագեբեի ողջ երկայնքով։ Նրանցից կարելի էր ճանաչել միայն Արարատ Զուրաբյանին, Արամ Մանուկյանին, Անդրանիկ Հովակիմյանին։ Այլ բարձրաստիճան ՀՀՇ-ականներ այդպես էլ չերեւացին։ ՆԳ համակարգի մի քանի աշխատակիցներ երթի ավարտին միայն դանդաղ քայլերով եւ անտարբեր մոտեցան նախարարության մուտքի մոտ։ Արարատ Զուրաբյանը նրանց հավաստիացրեց, որ ամեն ինչ կանցնի հանդարտ, եւ նրանց միջամտության կարիքը չի զգացվի։ Երթի մասնակիցների մեջ էր նաեւ ՀՀՇ-ի Գեւորիկը, որը՝ աչքերը արցունքներով լցրած եւ արդեն խռպոտած ձայնով փորձում էր ամենաբարձրը վանկարկել Վանո Սիրադեղյանի անունը։
Անդրանիկ Մանուկյանին հարցրեցի, թե այս բացականչությունները Սիրադեղյանը կլսի՞, թե՞ ոչ։ Ասաց, որ անպայման կլսի, քանի որ նրա մեկուսարանը առաջին հարկում է։ (Ի դեպ, Վանո Սիրադեղյանին տեսակցելու ցանկություն նրա բարձրաստիճան ընկերներից եւ ոչ մեկը չի հայտնել)։
Մոռացա նշել, որ մինչեւ մոմերը վառելը, բարձրաձայն հնչեց «Հայր մերը»։ Մասնակիցներից մեկը կատակեց. «Իսկ խունկ չե՞ք բերել»։
Կարդացեք նաև
Այս ամենը տեւեց մոտ 10-15 րոպե։ Հետո վառվող մոմերը դրեցին գետնին ու շարժվեցին ով դեպի ՀՀՇ, ով՝ իր տուն։ Մոմերը անցնող մեքենաների հոսքից արագ մարեցին։
Հիշո՞ւմ եք «Պեպո» ֆիլմի վերջը, երբ բանտարկված Պեպոյի ընկերները՝ Դարչոյի գլխավորությամբ, մրգերի սինիներով, զուռնա-դհոլով գնում են նրան տեսակցելու։ Երգում են «Քյոռօղլու երգը»։ Վերջում էլ փոխանցում են Զիմզիմովի «սերդեչնի պրիվետը»։ Երեկվա երթի ենթատեքստը մի տեսակ այս սցենարն էր հիշեցնում։
Բայց՝ ի տարբերություն ֆիլմի, այստեղ (կագեբեի պադվալներում) արտաքին աշխարհին նայող պատուհաններ չկան։
Այսօր ՀՀՇ վարչությունը որեւէ պիկետ կամ երթ հավանաբար չի անի։ Վարչության անդամները լավատես են եւ հույս ունեն, որ իրենց ղեկավարը վաղն անպայման ժամը 15։30-ի մատույցներում ազատ կարձակվի։
Իսկ համազգային խորովածի նպատակով նախատեսված 150 կգ միսը դեռեւս սառնարանում է։
ԼԻԼԻԹ ԱՎԱԳՅԱՆ
