Մայիսի 4-ին, 22.45-ին Երեւան-Սեւան մայրուղու 32-րդ կիլոմետրի վրա ավտովթարի է ենթարկվել եւ մահացել ՆԳ եւ ԱԱ նախարարի խորհրդական Գուրգեն Հարությունյանը։ Պրն Հարությունյանը ժամանակին զբաղեցրել էր ԱԱՊՎ հետախուզության վարչության պետի պաշտոնը։
ԿՈՄԿՈՒՍԸ ՓՈՂ ՉՈՒՆԻ
Կոմունիստական կուսակցությունը նախընտրական քարոզարշավի ընթացքում գումար ծախսելու քիչ հնարավորություն ունի։ Կոմկուսը գնել է միայն ՀԱՀ-ի օրենքով հասանելիք վճարովի ժամերը (600 դոլարի չափով) եւ Ազգային ռադիոյի նույնպիսի ժամերը (470 դոլարի չափով)։ Մասնավոր հեռուստաընկերությունների ժամերը գնելու միջոցներ չկան։ «Մեր ծախսածը բենզինն է, մեկ էլ մեր կոկորդը»՝ սա Կոմկուսի նախընտրական ծախսերի համառոտ շարադրանքն է։
Կարդացեք նաև
Կոմունիստական ընտրարշավի մասին կարդացեք 4-րդ էջում։
ՍՊԱՐԱՊԵՏ՝ ԱՅՈ, ԹԱԳԱՎՈՐ՝ ՈՉ
ՀԺԿ վարչության քարտուղար Արմեն Խաչատրյանը «Միասնություն» դաշինքի մասին ասել էր, թե դա թագավորի եւ սպարապետի միություն է։ Այս առումով Հանրապետական կուսակցության նախագահ Անդրանիկ Մարգարյանը հայտարարել է՝ կարծում եմ՝ անհաջող ձեւակերպում է։ Հանրապետության նախագահը Ռոբերտ Քոչարյանն է եւ նա պաշտոնավարում է։ Ինչ վերաբերում է սպարապետին, այո, պաշտպանության նախարարը Վազգեն Սարգսյանն է։
ՀԼԸ ՄԻ ԻՐԵՆՑ ԷԼ ՔՆՆԻ
Հավաստի աղբյուրներից «Առավոտին» հայտնի դարձավ, որ «ԱրմենՏելի» հիմնադրման գործունեության եւ սեփականաշնորհման գործընթացի՝ ՀՀ օրենսդրությանը համապատասխանությունն ուսումնասիրող ժամանակավոր հանձնաժողովին բացատրություններ տալու են կանչվել Հրանտ Բագրատյանն ու Վահրամ Ավանեսյանը։
