Վերջին օրերին հեռուստատեսությամբ քարոզարշավին հետեւելով՝ «Առավոտը» տեղեկացավ, որ
… Ճարտարապետ Լեւոն Իգիթյանը թեեւ քաղաքական գործիչ չէ, բայց զգում է «Արժանապատիվ ապագայի» ձգող ուժը։
… Հեռուստադիտողի աչքի առաջ շալվարն իջեցնող ու մերկ հետույքը ցուցադրող տղան իր հետույքով փաստորեն գովազդեց «Իրավունք եւ միաբանություն» դաշինքին։ Տառապալից-զառամած մի ձայն էր ուղեկից հիշյալ պատկերին. «Այստեղով անցել է թուրքը»։ Հետաքրքիր է իմանալ՝ այս մակարդակի քարոզչությամբ քանի ձայն կշահի «Իրավունքն ու միաբանությունը»։
… Սիլվա Կապուտիկյանը, Էդվարդ Միրզոյանը, Ռուբեն Հախվերդյանը, Ալբերտ Ազարյանը, Իսրայել Հակոբկոխյանը հավանում են նույն՝ «Իրավունք եւ միաբանություն» դաշինքը եւ օգտագործվում են դաշինքին ձայներ բերելու սուրբ առաքելությանը։ Ընդ որում, Իսրայել Հակոբկոխյանը իր խոսքը համեմեց ինչ-որ «փնթի սիրուհիների» մասին դատողություններով, որոնք կյանքում հեծանիվ չեն տեսել, բայց ավտոմեքենաներ են քշում։ Այս կերպ նա արտահայտեց իր վերաբերմունքը վատ իշխանությունների հանդեպ։
Կարդացեք նաև
… Կարեն Դեմիրճյանին իր խոսքի տրամաբանությունը հանգեցրեց հզոր հայրենիք ստեղծելու գաղափարին, թեեւ ինքը ոչ թե «Հզոր հայրենիքի», այլ ՀԺԿ-ի առաջնորդն է։
… «Հզոր հայրենիքն» էլ իր հզորությո՞ւնը, թե՞ հայրենիքը գովազդելու այլ միջոց չէր գտել, քան ջուրը ցատկող տղաներին ցուցադրելը, որոնք հեռուստախցիկին (այսինքն՝ ընտրողներին) լեզու էին ցույց տալիս ու ծամածռություններ անում։
