Եվրախորհրդի խորհրդարանական վեհաժողովի ավարտից հետո հայկական խորհրդարանական պատվիրակությունը մասամբ վերադարձավ Հայաստան, իսկ պատվիրակության ղեկավար Արմեն Մարտիրոսյանը մնաց Ստրասբուրգում։ Նա այնտեղից մեկնեց Բուդապեշտ, որտեղ պետք է մասնակցի ԵԽ հիմնադրման 50-ամյակի տոնակատարություններին, իսկ այնտեղից էլ՝ Լոնդոն, որտեղ էլի նույն առիթով հանդիսություններ են կազմակերպվելու մայիսի 5-ին։
ՉՀԱՄԵՄԱՏՎԵՔ
Եվրախորհրդում է գտնվում նաեւ ՀՀ արտգործնախարարության ներկայացուցիչ Վահե Վահրամյանը։ Նա տեղում կատարում է համեմատական վերլուծություն այն պահանջների միջեւ, որ դրվել են Հայաստանի եւ Վրաստանի առջեւ։ Ի դեպ, ասենք, որ Հայաստանը ե՛ւ Վրաստանից, եւ թե՛ Ադրբեջանից բավականին առաջ է անցել դատաիրավական բարեփոխումների օրենսդրական դաշտ ստեղծելու առումով։
Կարդացեք նաև
ԾԱՆՐ ԴԵՊՔ-2
«Առավոտը» ժամանակին հաղորդել էր, որ հարկային տեսչության պետ Սմբատ Այվազյանի բջջային հեռախոսն անջատել էին, քանի որ վարձը չէր մուծել։ Երեկ տեղեկացանք, որ նույն դեպքը պատահել է նաեւ Խոսրով Հարությունյանի հետ։ Տեղեկության աղբյուրն այն պատգամավորներն էին, որոնք փորձել էին ԱԺ նախագահի հետ կապվելով՝ նրան Սիրադեղյանի ձերբակալման մասին հայտնել։
ՆՐԱՆՔ ԻՍԿԱԿԱՆ ՉԵՆ՝ ԿԵՂԾ ԵՆ
Արմավիրի թիվ 38 ընտրատարածքի թեկնածուներից երեքը, նախընտրական քարոզարշավի ժամանակ ընտրողներին ցույց են տալիս իրենց կոմկուսի տոմսերը, որ պահել էին նեղ օրերի համար, եւ համոզում են ընտրողներին, թե իրենք կոմունիստ են։ Այս փաստերի դեմ բուռն դժգոհություն են հայտնում իսկական կոմունիստները։
