Տեւական ընդմիջումից հետո երեկ վերջապես էներգետիկայի նախարար Մերուժան Միքայելյանն ԱԺ եկավ։ «Առավոտի» հարցին, թե արդյոք պատգամավորներն իրեն կծելու փորձ արեցի՞ն, պատասխանեց. «Չէ, ինչ եք ասում։ Չէին էլ կարող լինել։ Ես այդ հայտարարությունները որպես կատակ եմ ընդունել, որ ինձ չեն կծի եւ այլն։ Նման խնդիր չունեմ եւ ԱԺ ցանկացած պատգամավորի հետ կարող եմ աշխատել»։ Մեր մյուս հարցին, թե որեւէ մեկը փորձ չարե՞ց իր հետ հաշիվ պարզելու «ՀՀՇ-ի արտադրական թափոններ» եւ նման արտահայտությունների համար, դարձյալ բացասաբար պատասխանեց. «Նման փորձեր չեն եղել եւ չեն էլ լինի»։
Փոքր-ինչ շտապեց, քանզի քիչ անց ԱԺ պատգամավոր Վահագն Խաչատրյանն իր ելույթում Մերուժան Միքայելյանի հասցեին բազմաթիվ «կծան» խոսքեր ասաց, որ պատգամավորներին ածականներ կպցնելու իրավունք իրեն ոչ ոք չի տվել եւ, որ ինքն արժանի չէ այդ մարդկանց գնահատականներ տալու. «Հաշվի առնելով, որ նրան ճանաչում եմ, նա ոչ քաղաքականությանը խառնվելու կարիք ունի, ոչ էլ փորձ»։
Ա. Ի.
