Վարչապետ Արմեն Դարբինյանը երեկ ընդունել է եռօրյա այցով Հայաստան ժամանած ՌԴ հարկերի եւ հարկահավաքման նախարար Գեորգի Բոսի գլխավորած պատվիրակությանը: Հանդիպման նպատակի եւ արդյունքների մասին լրագրողներին տեղյակ պահվեց բրիֆինգում, որտեղ հանդես եկան վարչապետը եւ ՌԴ նախարարը:
Հանդիպման նպատակը տնտեսական համագործակցության, առեւտրաշրջանառության, երկու երկրների հարկային օրենսդրության կազմակերպման հարցերի շուրջ ընդհանուր եզրեր գտնելն էր, ինչպես նաեւ հարկային տեսչությունների միջեւ աշխատանքային հարաբերությունների ստեղծումը: Հարկային տեսչությունները, ըստ վարչապետ Ա. Դարբինյանի, ունեն Հայաստանում ռուս, իսկ Ռուսաստանում հայ՝ հարկերից խուսափող գործարարների վերաբերյալ տեղեկատվության փոխանակման մեծ դաշտ:
Հանդիպման ընթացքում մի շարք հարցերում ձեռք են բերվել համաձայնություններ: Դա հատկապես վերաբերում է ընդհանուր միացյալ շուկա ստեղծելուն, որի հիման վրա էլ ենթադրվում է ամրապնդել երկու երկրների կորպորատիվ, տնտեսական, կառուցվածքային, նաեւ քաղաքական կապերը: Համաձայնություն է ձեռք բերվել սպիրտային խմիչքների հարկման ոլորտում՝ մասնավորապես Ռուսաստանում հայկական կոնյակի ստվերային առեւտրաշրջանառությունը կանխելու նպատակով կոնկրետ քայլեր ձեռնարկելու շուրջ: Պրն Բոսն այդ կապակցությամբ նշեց, որ 1998 թվականին սպիրտային խմիչքների շրջանառության մեջ 10-ից միայն երկու շիշն է օրինական ճանաչվել: Այս տարվա ընթացքում նրանց հաջողվել է հսկողության տակ առնել շուկայի համարյա կեսը, իսկ այդ ուղղությամբ ձեռնարկվող միջոցառումների շնորհիվ նախատեսվում է մինչեւ տարեվերջ այն հասցնել 80%-ի:
ԱՐՄԵՆՊՐԵՍ
