Չնայած Դաշնակցությունն առաջարկել էր այլ կուսակցություններին համախմբվել այն գաղափարի շուրջ, որ մականուն ունեցող մարդիկ մաս չկազմեն ապագա խորհրդարանում՝ ՀՅԴ Հայաստանի ԳՄ ցուցակում էլ կան նման մարդիկ։ Ասենք, թիվ 7-ը «Մուկ» մականունով Աղվան Վարդանյանն է, թիվ 13 Ռոլանդ Շառոյանին «Լոլո» են անվանում։ Թաքուն հույս ենք փայփայում, որ պատգամավոր չի դառնա անհատ ձեռներեց, ցուցակում 66-րդ Աշոտ Փափազյանը, որը հայտնի է «Պադոշ» մականունով։
ՉՄԻՋԱՄՏԵԼՈՒ ՔԱՂԱՔԱԿԱՆՈՒԹՅՈՒՆ
Մամուլում հրապարակված լուրերը, թե Ռոբերտ Քոչարյանն է «Երկրապահ» խմբի խորհրդական Գրիգոր Մելքումյանին առաջարկել ու համոզել Նոր Հաճընի թիվ 58 ընտրատարածքից հանել իր թեկնածությունը, որ անցնի Ռոբերտ Ամիրխանյանը՝ նախագահի մամուլի գրասենյակն անվանեց «բացարձակ սուտ։ Ռոբերտ Քոչարյանն այդ գործընթացներին որեւէ միջամտություն չի ունեցել»։
Կարդացեք նաև
ՊԵՏԱԿԱՆ ԱՋԱԿՑՈՒԹՅԱՆ ՑՈՒՑԱԿ
Ստույգ աղբյուրներից հայտնի է դարձել, որ «Միասնություն» դաշինքի ցուցակից անկախ՝ գոյություն ունի մեկ այլ ցուցակ եւս, որը պայմանականորեն կոչվում է պետական աջակցության ցուցակ։ Այն ձեռքի տակ ունեն գրեթե բոլոր կարեւոր քաղաքական կառույցները։
ՏՆԱՔԱՆԴ ԹԵԿՆԱԾՈՒՆ
Քանաքեռ-Զեյթունում պատգամավորության թեկնածու է առաջադրվել նաեւ Էդվարդ Սանդոյանի եղբայր Ռաֆայել Սանդոյանը, որը «Լենդբանկի» ղեկավարն է։ Զեյթունցիները վկայում են, որ նա ամենեւին էլ մեծ հարգանք չի վայելում տարածքում, քանի որ նրա բանկում գրավ են դրվել տներ, եւ այնուհետեւ չվերադարձված գումարի դիմաց բռնագրավվել՝ եւ մարդիկ զրկվել են տներից։
