Ինչպես հայտնեց «Սնարք» լրատվական գործակալության տնօրեն Էմանուիլ Մկրտչյանը, իր դեմ դատ բացած Էդուարդ Սախինովի գործունեությունը գովազդային կամպանիա է։ Քանի որ նա խզել է իր կապերը PTP հեռուստաընկերության (որի հետ դատվել է) եւ «Ռոսիյսկոյե ռադիո»-ի հետ եւ դուրս է եկել ասպարեզից, իր համբավը որոշել է այս կերպ պահպանել։
Ըստ պրն Մկրտչյանի՝ Սախինովը «Սնարքի» բաժնետերերից է եղել, ինչի մասին ինքը չի խոստովանում։ «Սնարքի» տնօրենը ցույց տվեց այն փաստաթուղթը, որում գրված է, որ Սախինովը «Սնարքի» բաժնետերերից մեկն է, եւ դիմացը Սախինովի ստորագրությունն է։ Նրան հենց այն բանի համար են բաժնետիրոջ տիտղոս առաջարկել, որ նա երբեք չի աշխատել այս գործակալությունում։ Սախինովը լավ հարաբերությունների մեջ է եղել «Սնարքի» նախկին տնօրենի հետ եւ այսօրվանի հետ էլ թշնամի չէ։ Երբ նա խնդրեց իրեն «Սնարք»՝ գործի ընդունել, նրան մերժեցին։
Ըստ պրն Մկրտչյանի՝ լրագրողը, երեւի, մտածեց. «Վսյո, նրանք մեռան» եւ ասաց. «Ձեր գործերը լավ չեն ընթանալու այս դեպքում»։ Եվ հայտնեց, որ «Սնարքը» նրան 6000 դոլար է պարտք՝ սա կուտակված տոկոսներն են, բայց նա մեծահոգի է եւ միայն սկզբնական գումարն է պահանջում՝ 2700 դոլար։
Պրն Մկրտչյանը PTP-ին հարցնում է՝ ո՞ւմ են նրանք գումար փոխանցել։ Հեռուստաընկերությունը պատասխանում է՝ «Դավիթ» -ին։ Սախինովին մնում է փաստաթուղթ ներկայացնել այն մասին, որ 2700 դոլարը նա իր անձնական հաշվից է հանել եւ ոչ թե՝ PTP-ի, որն իր աշխատակիցներին տարբեր տեսակի ծախսերի համար գումար է ուղարկում։
Կարդացեք նաև
Դատի առաջին փուլում դատավորը գլուխ չի հանել այս գործից եւ խնդրել է, որ նրանք ինքնուրույն հաշիվները մաքրեն։ Իսկ երկրորդում պրն Սախինովը հայտարարել է, որ չի ճանաչում պրն Մկրտչյանին գործակալության տնօրեն։ Այս փուլում է այժմ դատավարությունը, իսկ պրն Մկրտչյանը ասում է, որ բոլոր փաստաթղթերում, բոլոր իրավապահ մարմիններում կա այն վկայությունը, որ «Սնարք» լրատվական գործակալության տնօրենը հենց նա՝ Էմանուիլ Մկրտչյանն է։
Մ. ՄԵՐՈՒԺԱՆՅԱՆ
