«Առավոտի» ապրիլի 14-ի համարում հրապարակել էինք Դավիթ Վարդանյանի պարզաբանումները մեծամասնական ընտրահամակարգով չառաջադրվելու վերաբերյալ։ Նա մասնավորապես նշել էր, թե ինքն է ԱԺՄ վարչությունում առաջադրել այդ հարցը. «Քննարկեցինք եւ որոշեցինք, քանի որ «ԱրմենՏելը» հասարակական հնչեղություն ունի եւ, ի վերջո, պիտի հասցվի մինչեւ հունիսի 3-ը, իսկ դա համընկնում է ընտրարշավի ժամկետներին՝ ես չեմ առաջադրվի»։
Հրապարակումից հետո ԱԺՄ-ամերձ շրջանակից դժգոհություններ եղան, որ նման օրակարգով վարչության նիստ չի եղել, Դավիթ Վարդանյանն ինքն է որոշել այս խնդիրը եւ ԱԺՄ-ին հաշվետու չի եղել։ Պնդման իսկության մեջ համոզվելու համար «Առավոտին» առաջարկեցին դիմել ԱԺՄ վարչության ցանկացած անդամի։ Մենք էլ դիմեցինք Շավարշ Քոչարյանին։ Նա նշեց, թե ձեւական առումով վարչության նիստերի օրակարգում իրոք չի եղել նման հարց։ Դավիթ Վարդանյանն իրենց ուղղակի տեղյակ է պահել եւ ներկայացրել, թե ինչու է աննպատակահարմար համարում մեծամասնականով իր առաջադրվելը։ Հիմնական դրդապատճառն էլի «ԱրմենՏելն» էր։ Իրենք էլ կարծիքներ են փոխանակել, այսինքն՝ քննարկում եղել է, բայց դարձյալ ձեւական (ֆորմալ) առումով՝ այս հարցով ԱԺՄ վարչությունը չի որոշում կայացրել։
Ա. Ի.
