Մայրաքաղաքի փողոցներով «Դրո» (նաեւ՝ լատինատառ «Dro») հսկա մակագրությամբ բեռնատար մեքենաներ են երթեւեկում։ Ժամանակին ՀՅԴ-ն ջանք ու եռանդ չխնայեց ապացուցելու «Դրո» կառույցի հետ իր անհամատեղելիությունը։ Իսկ նշված մեքենաների տերերն ակնհայտորեն ջուրն են գցում այդ բոլոր ջանքերը, քանի որ մեքենաների առջեւի ապակու վրա էլ մեկ այլ մակագրություն կա՝ Հայ Յեղափոխական Դաշնակցություն (նույնիսկ հեռախոսահամար կա՝ 5-11-97)։ ՀՅԴ ԳՄ պատասխանատուներն այս «Դրո»-ների հետ էլ իրենց կապը կտրականապես ժխտեցին՝ հավաստիացնելով, որ այդ մեքենաներն իրենց չեն պատկանում։ Մնում է ենթադրել, որ «Դրո» մեքենաների հայտնությունը նախընտրական սադրանք է ու ՀՅԴ-ի թշնամիների ձեռքի գործը։ Կամ՝ գուցե իրադրության նո՞ր փոփոխություն է սպասվում։
ԱԶՆԻՎ ԱՐԱՐՔ
Հեռուստատեսությամբ հաճախակի երեւալու հնարավորությամբ իր մրցակիցներին անհավասար պայմաններում չթողնելու ցանկությամբ ԱԺ պատգամավորության թեկնածու, ՀՅԴ Հայաստանի ԳՄ անդամ Աղվան Վարդանյանը քարոզարշավի ընթացքում չի վարի իր հեղինակային «Ով ով է» ամենշաբաթյա հաղորդումը։ Այդ ընթացքում նրան կփոխարինի լրագրող Կարինե Խոդիկյանը։
Կարդացեք նաև
ՈՒՐԵՄՆ ՀԶՈՐ ՉԵՆ
«Հզոր հայրենիք» կուսակցության մեջ տարակարծություններ կան« թե իրենց կազմակերպությունն, իրոք, հզոր է։ Ախալքալաքցիների այդ կազմակերպությունում տարակուսում են՝ եթե իրենք, իրոք, հզոր լինեին, ապա արդեն կուսակցության շարքերում կլիներ Մերուժան Տեր-Գուլանյանը՝ նույնպես ջավախքցի։
