Ինչպես բոլոր եվրոպական պետություններում, Հայաստանում էլ ստեղծվել է Եվրախորհրդի 50-րդ տարեդարձի տոնակատարությունները կազմակերպող Ազգային կոմիտե։ Մեզանում այն գլխավորում է արտգործնախարար Վարդան Օսկանյանը։
«ԽԻՍՏ ՍԱԿԱՎԱԹԻՎ ԴՐԱԿԱՆ ՔԱՅԼԵՐԻՑ ՄԵԿԸ»
Ընդդիմադիր լինելն անպայման ամեն ինչ մերժելը չէ։ Թերեւս այդ պնդման հաստատումն է, որ «21-րդ դար» կուսակցության նախագահ Դավիթ Շահնազարյանը «Առավոտի» թղթակցի հետ զրույցում որպես դրական քայլ գնահատեց ՆԱՏՕ-ի 50-ամյակի տոնակատարությանը Ռոբերտ Քոչարյանի մասնակցելու որոշումը. «Իհարկե, պիտի գնար՝ ինչի մասին է խոսքը։ Ինչքա՞ն կարելի է մեկուսացված մնալ։ Սա արված խիստ սակավաթիվ դրական քայլերից մեկն է»։
Կարդացեք նաև
ՊԱՐԶԱԲԱՆՈՒՄ Է ԸՆԿԵՐԸ
«Որսապետություն» լրատվության առթիվ ուզում եմ իմ սիրելի թերթին հայտնել հետեւյալը. Երեւանի թիվ 4 հացի գործարանի տնօրեն, պատգամավորության թեկնածու Վարդգես Մաթեւոսյանը, որն իմ 30 տարվա բարեկամն է ու ընկերը, երբեք ածական անուն չի ունեցել եւ երբեք չի ձգտել ուրիշի ածական անունը «սեփականաշնորհել»։ Հասկանում ենք, որ նախընտրական պայքար է եւ նաեւ նման անազնիվ խաղերն են արդարացվում։ Բայց ուզում եմ հայտնել նաեւ, որ Վարդգեսը գլուխ գովան որսորդ չէ»,- «Առավոտին» հայտնեց ճանաչված լրագրող Վալերի Հարությունյանը։
ՄՈՒՀԱՄԵԴՆ Է ՄԻՇՏ ԳՆՈՒՄ ՍԱՐԻ ՄՈՏ
Ըստ «Առավոտ» հասած լուրերի, «Միասնություն» դաշինքի ձեւավորումից հետո սկսել է Կարեն Դեմիրճյանին այցելել Ռազմիկ Դարբինյանը։ Հիշեցնենք, որ մսի կոմբինատի տնօրենը հայրն է ՀՀ վարչապետ Արմեն Դարբինյանի։
