ԿԸՀ նախագահ Խաչատուր Բեզիրջյանի պնդմամբ, հինգշաբթի ուշ երեկոյան ռամկավարները հետ վերցրեցին ԿԸՀ ներկայացված իրենց ստորագրությունների մի մասը՝ այդպիսով զիջելով Դաշնակցությանը 5-րդ տեղը ընտրական հանձնաժողովներում: Եթե դա ճիշտ է, ուրեմն, մենք գործ ունենք երկու ավանդական կուսակցությունների ողջունելի համագործակցության հետ: Եթե սուտ է, ուրեմն ՀՀՇ-ական Բեզիրջյանը կատարում է Դաշնակցության պատվերը՝ ռամկավարներին վարկաբեկելու ուղղությամբ: Գուցե պրն Բեզիրջյանը նո՞ւյնպես, Արտաշես Թումանյանի նման, այս 10 տարվա ընթացքում ՀՅԴ չբացահայտված համակիր էր:
Սամվել Բաբայանը
Մեր գեներալները մի կողմից ձգտում են ակտիվ դեր խաղալ առաջիկա ընտրություններում եւ ընդհանրապես քաղաքական պայքարի մեջ, մյուս կողմից՝ պահանջում են, որ, հարգելով իրենց ռազմական վաստակը, ոչ ոք չհամարձակվի մեկնաբանել իրենց քաղաքական հայտարարությունները: Անսալով այդ կոչին՝ առանց մեկնաբանությունների մեջ ենք բերում «Ազատություն» ռ/կ-ի հաղորդման վերծանությունից մի հատված. «Հայաստանի բարձրաստիճան պաշտոնյաներից մեկն ասել էր, թե Սամվել Բաբայանը լավ ձիու վրա չի դրել խաղագումարը. սրա՞ն ինչպես է վերաբերվում: Պատասխանն այսպիսին է. «Ես մի թուլություն ունեմ, սիրում եմ անպաշտպաններին, թույլերին ու տկարներին, մի խոսքով նրանց, ում իրավունքները ոտնահարվել են, նրանք միշտ էլ աջակցության կարիք ունեն»:
Կարդացեք նաև
Արամազդ Զաքարյանը
Ճիշտ էր ասում Նադիր շահը «Ալմաստ» համանուն օպերայից. մեկ անգամ դավաճանածն այլեւս ոչ մեկի վստահությունը չի կարող վայելել: Հիշում եք, Ալմաստը «գցեց» Թաթուլին եւ հայերին՝ հոգուտ Նադիր շահի: Վերջինս էլ՝ վստահ լինելով, որ վաղ թե ուշ իրեն էլ «կգցի», Ալմաստի հետ վարվեց այնպես, ինչպես որ սույն կինը արժանի էր: Ճիշտ նույն ձեւով վարվեցին երկրապահները Ալյոշայի /Արամազդի/ հետ: Եթե նա մի անգամ «գցեց» Պարույր Հայրիկյանին, որին նա ոտից գլուխ պարտական է իր՝ քաղաքական դեմք դառնալու համար, ապա ինչո՞ւ նույնը չի անի երկրապահների հետ:
ԱՐԱՄ ԱԲՐԱՀԱՄՅԱՆ
