Նախորդ օրը մամլո ասուլիսում ՀՀԿ փոխնախագահ Տիգրան Թորոսյանը հայտարարել էր, թե հակառակ մամուլում եղած պնդումների, Էդվարդ Եգորյանը չի մասնակցել «Միասնություն» դաշինքի կազմավորման բանակցային պրոցեսին։
Հենց այս հարցով էլ սկսեցինք հարցազրույցը «Հայրենիք» պատգամավորական խմբի նախագահ Էդվարդ Եգորյանի հետ։
-Այդ մասին, իհարկե, Թորոսյանը կարող էր եւ չիմանալ։ Բանակցություններ եղել են, իսկ դրանց նյուանսներն այդքան էլ էական չեն, որովհետեւ խոսքը բանակցային գործընթացի մասին է։ Մանրամասներ ասելու անհրաժեշտություն, այս հարցի շուրջ, առայժմ չեմ զգում։ Բայց, ասեմ նաեւ, որ, իրոք, մենք չէինք կարող մաս կազմել այդ միությանը՝ շատ ավելի ֆունդամենտալ պատճառներով։ Բանակցային գործընթացն այստեղ դեր չի խաղում։
-Իսկ ի՞նչ արմատական խնդիրներ նկատի ունեք։
Կարդացեք նաև
-Նշեմ մի քանիսը, որոնք ի սկզբանե բացառելու էին նման եռյակի կազմավորումը։ Բավական է ծանոթ լինել մեր ուղերձին եւ մեր գործունեությանը եւ ամեն ինչ չափից դուրս պարզ կդառնա։ Ներկայացնում եմ մի քանի նախադասություն մեր ուղերձից, որոնք, ըստ էության, կցուցանեն, թե ինչու չէր կարող մեր միջեւ դաշինք գոյանալ։ Մենք համարում ենք, որ ժողովո՛ւրդը պետք է ընտրի իշխանություն եւ ոչ թե ոստիկանությունն ու բանակը, մենք համարում ենք, որ Հայաստանը պետք է կառավարեն հայաստանցիները, մենք համարում ենք, որ գործող նախագահը պետք է հեռանա եւ օրինական նախագահական ընտրություններ անցկացվեն, մենք համարում ենք, որ էլեկտրաէներգիայի, գազի, ջրի սակագները պետք է իջեցվեն, իսկ այդ հարցի քվեարկություններին չեն մասնակցում երկրապահ պատգամավորները, մենք համարում ենք, որ բանակում ծառայելու ժամկետը պետք է լինի 1,5 տարի եւ էականորեն պետք է բարելավվեն ծառայության պայմանները բանակում։ Այս ամենի հանրագումարում, իմ կարծիքով, ակնհայտ է դառնում բոլորին՝ անկախ նրանից, թե ինչ է խոսվել բանակցություններում, ինչ բառեր են արտասանվել, այդպիսի եռյակ, իմ նշած հիմքերով, չէր կարող կազմավորվել։ Իմ թվարկած դրույթները ֆունդամենտալ հասկացություններ են, որոնք դրված են մեր գործունեության հիմքում։ Իսկ «Միասնություն» բլոկը դժվար թե առաջնորդվի վերոնշյալ սկզբունքներով։
-Ձեր ուղերձում ներառված է 11 կետ։ Ըստ որոշ լուրերի՝ դուք «Միասնություն» դաշինքին էլի 11 կետից բաղկացած առաջարկների փաթեթ եք ներկայացրել, որոնք չեն ընդունվել։ Արդյո՞ք դրանք նույն առաջարկներն են։
-Դա էական չէ։ Սակայն ասեմ միայն մեկ բան՝ ամենակարեւոր հարցը, որ մենք արծարծել ենք բանակցային գործընթացում, վերաբերում էր «Սակագների սառեցման մասին» օրենքի ընդունմանը։ Այդ 11 կետերը ոչ թե պահանջներ էին, այլ ֆունդամենտալ հիմքն այն բանի, թե ինչու չէր կարող նման դաշինք կայանալ։ Մենք այդ ծրագիրն իրագործելու առաջարկ էինք անում, որի դրույթները ձեւակերպված էին մի փոքր այլ կերպ՝ առաջարկում էինք կառուցվածքային փոփոխություններ։
-Իսկ դուք ո՞ւմ հետ եք բանակցել։
-Բնական է, որ բանակցում են բարձրագույն մակարդակով՝ համապատասխան կազմակերպությունների ղեկավարների հետ։
-Դուք բանակցել եք Կարեն Դեմիրճյանի հե՞տ։
-Եվ՝ Վազգեն Սարգսյանի։ Ոչ մեր նախաձեռնությամբ։
-Իսկ ո՞ւմ նախաձեռնությամբ։
-Հատկապես Վազգեն Սարգսյանի, ինչպես նաեւ Կարեն Դեմիրճյանի։
-Տիգրան Թորոսյանի ասածից այն տպավորությունը ստացա, գուցե ընկալումս սուբյեկտիվ է, որ դուք որեւէ կերպ ներգրավված չեք եղել բանակցային գործընթացում եւ պարզապես փորձել եք այդ դաշինքի մեջ տեղ ունենալ եւ չեք ունեցել։
-Ես չգիտեմ, որ Տիգրան Թորոսյանը նման բան ասած լինի։ Բոլոր դեպքերում, դա իրականությանը չի համապատասխանում։ Պաշտոնապես հայտարարում եմ՝ նախաձեռնությունը ես չէ, որ ցուցաբերել եմ։ Նախաձեռնությամբ հանդես է եկել Վազգեն Սարգսյանը։
-«Օրագիր» թերթը գրել էր, որ ՀԺԿ-ն ու ՀՀԿ-ն ուշացրել են պատասխանը ձեզ, որպեսզի չձեւավորվեր ԱԺՄ եւ «Ժողովրդավարական հայրենիք» կուսակցությունների միավորումը։ Որքանո՞վ է դա ճիշտ։
-Անկեղծ ասած, ես ջանքեր եմ թափել, որպեսզի այդ դաշինքը կայանա։ Ուզել եմ, որ կայանա Դեմիրճյան-Մանուկյան եւ Եգորյան դաշինքը։ Համարել եմ, որ մեր երկրի համար, եւ ոչ թե Մանուկյանի կամ Եգորյանի համար, խիստ օգտակար կլիներ այդպիսի դաշինքը, որն ի վիճակի կլիներ այս կացությունից երկիրն արագորեն դուրս բերել։ Ցավում եմ, որ այդ դաշինքը չկայացավ։ Այստեղ խիստ դժվար է իսկական պատճառները գտնել։ Այդպիսի միությամբ, չեմ էլ թաքցնում՝ առանձնապես լուրջ պահանջներ չդնելով էլ, մենք համաձայն կլինեինք այդ դաշինքին, մեկ-երկու տարվա ընթացքում էական արդյունքներ կարող էինք արձանագրել երկրում։
-Դուք ներկայացրեցիք այն դրույթները, որոնց շուրջ համաձայնություն չեք կարողացել ձեռք բերել «Միասնություն» դաշինքի հետ, մինչդեռ տեսակետ կա, թե այդ դաշինքը, գուցե անուղղակիորեն, ուղղված է գործող իշխանության եւ Ռոբերտ Քոչարյանի դեմ։
-Անկեղծ ասած, լուրջ չեմ համարում այդ ենթադրությունները, թե այդ դաշինքն ուղղված է Ռոբերտ Քոչարյանի դեմ։ Իմ կարծիքով, նաիվություն կլինի այդպես մտածելը։
-Ինչի՞ց ելնելով եք այդպես դատում։
-Թեկուզ՝ նրանից, որ այդ պարագայում Վազգեն Սարգսյանը չէր կարող մնալ նախարար։ Չի կարող պատահել, որ պաշտպանության նախարարը, կազմի դաշինք, այդքան ակնհայտորեն, գործող նախագահի դեմ։ Դա անհնար է եւ նաիվների համար։
-Ի՞նչ եք կարծում, ի՞նչ կտա «Միասնություն» դաշինքը մեր պետականությանը։
-Չէի ցանկանա ժամանակից առաջ ընկնել եւ գնահատականներ տալ։ Աստված տա, որ այդ դաշինքը օգուտ բերի մեր երկրին։ Եթե համոզված լինեի, որ այդպես է լինելու, իրոք, ամեն ինչ կանեի դաշինքում տեղ գտնելու համար։
-Իսկ ինչո՞ւ ԱԺՄ-ի հետ դաշինք չկազմեցիք։
-Կարելի է ասել հետեւյալ կերպ՝ եթե այդ եռակողմ դաշինքը չէր կայանում, ապա այնքան էլ մեծ չէր երկկողմ դաշինքի իմաստը, բայց մենք պատրաստ ենք։ ԱԺՄ-ի հետ գոյություն ունի համագործակցություն եւ այդպես պետք է շարունակվի, ստեղծելու այն փրկության օղակը, որն ինչ-որ պահի պետք կգա մեր երկրին։
Զրույցը վարեց
ԱՐՄԵՆ ԶԱՔԱՐՅԱՆԸ
