«Բոլորիս մտահոգող, նյարդայնացնող հարցը կրթական համակարգում կաշառքն է, այսինքն փողով քննություն ստանալը։ Սա ամենաանթույլատրելի բանն է։ Սրա համար պետք է ծեծել։ Անգամ այլ քրեական պատիժների մասին չեմ խոսում՝ ապտակել է պետք ուղղակի մարդկանց, որոնք այդ բանը թույլ են տալիս»,- Վահան Հովհաննիսյանի այս հայտարարությունները համալսարանում մտատանջությունների պատճառ դարձան նույնիսկ «Հայոց աշխարհի» աշխատակից Արմեն Հակոբյանի համար։ Ծեծի կողմնակից լինելով, նրան, այնուամենայնիվ, հետաքրքրում էր՝ կաշառակերներին շարիաթի օրենքներով ճիպոտահարելո՞ւ են, թե՞ ազգային մի-մի դմբուզ են հասցնելու։ Քանի որ ձեւակերպումը հստակ չէր՝ մեզ էլ միայն հետաքրքրում է. կաշառատուների՞, թե՞ կաշառակերների տուտուզիկներին է խփելու Դմբուզ Վահանը։
ՎԱՏ ԼՈՒՐ
Մեծամասնական ընտրակարգով ԱԺ պատգամավորության թեկնածու առաջադրվածների ցուցակում են հայտնվել ամենաօրիգինալ անուններ ունեցողները։ Երեսփոխան դառնալու բուռն ցանկություն ունեն Բաքոն, Սերվանտեսը, Զալիբեկը, Կիմիկը, Վավան, Ֆրոնտիկ Թոսյանը, Ֆերդինանտը (չշփոթել Ավստրիայի թագաժառանգի հետ), Կազբեկն ու Աննմանը, Վիլյոշան եւ Արազբեկը, Սանդրիկ Եսիրյանն՝ անձամբ։ Եթե բախտը ժպտա այս թեկնածուներին, եւ նրանք հայտնվեն խորհրդարանում, ապա որքան կջերմանա ընտրողների կյանքը, երբ պարոն Սերվանտեսն ու պարոն Ֆրոնտիկը չորրորդ խոսափողից հարցեր առաջադրեն հարազատ կառավարությանը։ Վերոհիշյալ անուններն ունեցող թեկնածուների սեռական պատկանելության մասին ոչ մի ինֆորմացիա չենք կարող հաղորդել, որովհետեւ հայերին շատ չկա, մեկ էլ տեսար՝ կվերցնեն ու մի այնպիսի անսեռ անուն կդնեն, որ վերջնականապես կխճճվես։
