Մարտի 31-ին ՀՀ ԱԺ էր ժամանել Հայաստանում Հունաստանի դեսպան Պանայոտիս Զոգրաֆոսը եւ փակ դռների հետեւում շուրջ 1,5 ժամանոց առանձնազրույց ունեցել ԱԺ պատգամավոր, «21-րդ դար» ԺԱԿ-ի նախագահ Դավիթ Շահնազարյանի հետ։ Չնայած «Առավոտի» հետաքրքրությանը, Դավիթ Շահնազարյանը զլացավ որեւէ տեղեկատվություն հաղորդել կամ մեկնաբանություն անել առանձնազրույցի վերաբերյալ։
ԽԱՎԻԱՐԱՊԱՏՎՈՒԹՅՈՒՆ
Վերջին օրերին խորհրդարանում խոսվում է, թե սոցիոլոգ Լյուդմիլա Հարությունյանի գլխավորությամբ գրանցված «Արժանապատիվ ապագա» նախընտրական միավորը գտնվում է վարչապետ Արմեն Դարբինյանի հոգեբանական եւ ֆինանսական ազդեցության ներքո։
Կարդացեք նաև
ՆՈՐ ՊԱՌԱԿՏՈ՞ՒՄ
«Առավոտին» հաջողվեց պարզել, որ մոտ օրերս հայտարարությամբ հանդես կգան ՀՀՇ-ի արարքցյանական թեւի ներկայացուցիչները։ Որ հայտարարության հիմքում անհամաձայնություններ են՝ պարզ է։ Բայց այնքան էլ հստակ չէ՝ իրենց այդ հայտարարությամբ ՀՀՇ-ից դուրս գալու քայլ ձեռնարկո՞ւմ են արարքցյանականները, թե՞ ոչ։
Ո՞Վ ԷՐ ԵՐՐՈՐԴԸ
Մարտի 30-ին կազմավորվեց Ժողովրդական եւ Հանրապետական կուսակցությունների «Միասնություն» նախընտրական դաշինքը։ «Երկրապահ» պատգամավորական խմբին մոտ կանգնած աղբյուրներն «Առավոտին» վկայեցին, որ դաշինքի կազմավորման բանակցային գործընթացում ընդգրկված է եղել նաեւ «Ժողովրդական հայրենիք» կուսակցության նախագահ Էդվարդ Եգորյանը, որի գլխավորած կազմակերպությունը, սակայն, անհայտ պատճառներով դուրս է մնացել այդ դաշինքից։
