Մեր կուսակցությունները սիրում են համախմբվել, միմյանց գնահատել ու «բանի տեղ դնել» միայն այն դեպքում, երբ այդ համախմբումը ինչ-որ մեկի դեմ է։ Եվ այդ ինչ-որ մեկն անպայման հայ է։
Տվյալ դեպքում համախմբվել են ՀՅԴ-ն, ԳիԱրՔՄի-ն, ՍԻՄ-ը, Մտավորականների միությունը, Դեմկուսը՝ ընդդեմ հայրենի կառավարության։ Բանն այն է, որ կառավարական հանձնաժողովը (մասնագիտական անլիարժեք կազմով) բանի տեղ չի դրել 11 կուսակցությունների ներկայացրած «Հայաստանի տնտեսության առողջացման հիմնական առաջնահերթությունները» ազգային վերնագրով ծրագիրը։ Դրա հեղինակն ու նախաձեռնողը, բնականաբար, ՀՅԴ-ն է։ 11 կուսակցություններով հինգ ու կես ամիս քննարկելուց ու ծրագիրն ընդունելուց հետո այն ուղարկել են ՔԽ։
Այստեղ այն ըմբռնելուց եւ հաստատելուց հետո փետրվարի 4-ին ուղարկվել է կառավարություն։ Ծրագիրը նկատել են 1,5 ամիս անց ու սկսել քննարկել, բայց առանց դրա հեղինակների։ Սա էլ մեր 11 կուսակցությունների լավությունը կառավարությանը։ Ձրի աշխատանքի դիմաց կառավարությունը մի շնորհակալությունն ի՞նչ է, դա էլ չի ասել։ Փոխարենը՝ զանգ են տվել ՀՅԴ անդամ Թաթուլ Մանասերյանին ու թե՝ կներեք, որ ծրագրի արժանիքները չեն քննարկվել։
Քանի որ լրագրողներիս հետ՝ բացի պրն Մանասերյանից, վերոնշյալ կուսակցություններից էլ էին եկել, նրանց ներկայացուցիչները որոշեցին իրենք էլ խոսել (թեկուզեւ՝ անկապ)։ Մասնավորապես հայտնվեցին մտքեր, թե՝ ՔԽ-ը նախագահը չի ստեղծել, դա մեր կուսակցությունների հաղթանակն է։ «Կառավարությունները, պրեզիդենտները կգան, կգնան, բայց քաղաքական աշխատանքը կմնա (հավերժ- Լ. Ա.)»։
Կարդացեք նաև
«Մեր այս ծրագիրը նախագահի նախընտրական խոստումներն իրականացնելու փորձ է»,- այսպես փորձեց պրն Մանասերյանը ներկայացնել իրենց ալտերնատիվ ծրագրի տրամաբանությունը։
Այն հարցին, թե այսպես համախմբվելով ծրագրի շուրջ եւ կառավարությունից դժգոհելու փոխարեն ավելի լուրջ չէ՞ր լինի կազմել նախընտրական բլոկ եւ այդ ծրագիրը ներկայացնել իբրեւ նախընտրական ծրագրի մաս։ Կամ, ասենք, կազմել ալտերնատիվ կառավարություն։ Հնչեց հետեւյալ բարեպաշտությամբ քողարկված, բայցեւ հավակնոտ միտքը. «Մենք պետք է հաշվի առնենք իրականությունը, որ գտնվում ենք ոչ այլ երկրում, քան ասիական Հայաստանում՝ իր լավ ու վատ կողմերով։ Բայց պետք է նաեւ իրատեսական լինենք (այս միտքն ասվեց ալտերնատիվ կառավարության մտքի շուրջ- Լ. Ա.)։ Եվ բարի ցանկությունները որպես իրականություն չմատուցենք»։
«Հայաստանի տնտեսության առողջացման հիմնական առաջնահերթությունները» ծրագրի պատվերը, ինչպես ասացին, նախագահը չի տվել։ Նախաձեռնողը մասնակիցների խումբն է՝ ՀՅԴ-ի գլխավորությամբ։ «Մենք իրատեսականորեն լավատես ենք եւ կառավարությանը սեւացնելու նպատակ չունենք։ Հույս ունենք, որ կառավարության մեջ համախոհներ ունենք»։
Անգամ ասուլիսից հետո անհասկանալի մնաց ծրագրի բուն նպատակը (որքան էլ գործող կառավարության ծրագիրը ապաշնորհ է)։ Պարզապես ժամանակ կորցնել (եւ այն էլ անվճար), հինգ ու կես ամիս գլուխ ցավեցնել թեկուզ անիրավացիորեն անգործության դատապարտված ծրագրի վրա, այնքան էլ լուրջ չի հնչում։ Թեկուզեւ գործի գլխին, ինչպես ասում են, կանգնած է ՀՅԴ-ն։
ԼԻԼԻԹ ԱՎԱԳՅԱՆ
