Հայաստանի կոմունիստական կուսակցության գրասենյակում մարտի 22-ին տեղի ունեցավ մամլո ասուլիս, որտեղ ներկայացվեցին մարտի 20-ին տեղի ունեցած կուսակցական պլենումի արդյունքները եւ ՀԿԿ-ի դիրքորոշումը ԱԺ խորհրդարանական ընտրություններին։
ՀԿԿ առաջին քարտուղար Սերգեյ Բադալյանը ներկայացրեց պլենումի օրակարգային հարցերը, որոնցից թերեւս ամենակարեւորը մեծամասնական եւ համամասնական ընտրություններով առաջադրվող թեկնածուների հաստատումն էր։
Նա նշեց, որ հանրապետության 50 ընտրատարածքներում, բացի Երեւանից, մեծամասնական ընտրակարգով փակ-գաղտնի քվեարկությամբ ընտրվել են 47 թեկնածուներ, ինչպես նաեւ առաջադրվել է 2 անկուսակցական թեկնածու։ Մայրաքաղաքի 25 ընտրատարածքներից 21-ում առաջադրվել են նույնպես կուսակցական թեկնածուներ։
Համամասնական ընտրացուցակներով կուսակցությունն առաջադրել է 87-ից 84 անձի (՞) թեկնածություն, որի 10-17 տոկոսը կանայք են։ Այս փաստը Ս. Բադալյանը ցնծությամբ նշեց, քանի որ մյուս կուսակցություններում այն բացակայում է։ Մի քանի ընտրատարածքներում առաջադրվել էր կոմունիստական կուսակցության երկու թեկնածու, սակայն պլենումը հաստատեց ընտրատարածքներում մեկական թեկնածու։
Կարդացեք նաև
Կոմկուսի ղեկավարը հայտնեց, որ Հայկոմկուսը մշակել է նախընտրական ծրագիրը (ի դեպ, դրա հեղինակը Ս. Բադալյանն է), որը, ըստ նրա, իրատեսական է։ Ծրագրում առաջնային տեղ է հատկացված սոցիալ-տնտեսական պրոբլեմներին, ՀՀ Սահմանադրությունում փոփոխություններին վերաբերող հարցերին։
Իսկ ինչպիսի միջոցներով է կուսակցությունը տանելու իր նախընտրական քարոզարշավը։ Այս հարցը հետաքրքրում էր բոլորին, որի սպառիչ պատասխանը տվեց կուսակցության քաղկոմի քարտուղար, ԱԺ պատգամավոր Գագիկ Թադեւոսյանը մարտի 20-ին կուսակցության գրասենյակում տեղի ունեցած մամլո ասուլիսի ժամանակ. «Գումարները հավաքվելու են կուսակցական կազմակերպություններից, «Ով ինչքան կարող է» սկզբունքով։ Կլինեն հանգանակություններ եւ օրենքով սահմանված կարգով այլ դրամահավաքներ»։
Այժմ նշենք, թե ՀԿԿ-ն կուսակցական իր ցուցակներում առաջնային տասնյակում ում է ներգրավել՝ Սերգեյ Բադալյան, Վլադիմիր Դարբինյան, Լեոնոիդ Հակոբյան, Հրանտ Ոսկանյան, Ֆրունզե Խառատյան, Յուրի Մկրտչյան, Գագիկ Մանուկյան, Գագիկ Թադեւոսյան, Նորիկ Պետրոսյան… Մի խոսքով բոլորն էլ ծանոթ դեմքեր են։
Ա. ԼԱՎՉՅԱՆ
