«21-րդ դար» կուսակցության առաջնորդ Դավիթ Շահնազարյանը երեկ հայտարարեց, որ իրենց կուսակցությունն անիմաստ է համարում խորհրդարանական առաջիկա ընտրություններին մասնակցելը։ Նման հայտարարություն արեց նաեւ ՌԱ(ԼԴ)Կ կուսակցության ղեկավար Վիգեն Խաչատրյանը։ Նրա կարծիքով, ընտրությունները պետք է բոյկոտել։ ՌԱ(ԼԴ)Կ-ի դեպքում վերջնական քննարկումից հետո ամեն ինչ պարզ կլինի։ Ըստ պրն Խաչատրյանի՝ «կուսակցությունը կբոյկոտի ընտրությունները ոչ թե նրա համար, որ չի ուզում ընտրվել, այլ՝ որովհետեւ առաջարկում է սկսել նոր քաղաքական պայքար»։
ՎԱՏ ԼՈՒՐ
Էներգետիկայի նախարար Մերուժան Միքայելյանը՝ չափազանց վրդովվելով «Էլեկտրաէներգիայի սակագների սառեցման մասին» օրինագծի ընդունումից, իր հարցազրույցներից մեկում ասել է, թե ԱԺ-ում կա 96 հատ Սադոյան, եւ դրանք բոլորը ՀՀՇ-ի արտադրական թափոններ են։ Դրանով նա մահացու վիրավորանք հասցրեց թե՛ պրն Սադոյանին, թե՛ ՀՀՇ-ին եւ թե՛ մանավանդ կողմ քվեարկած այն պատգամավորներին, ովքեր ՀՀՇ-ի հետ երբեւէ կապ չեն ունեցել, մասնավորապես, կոմունիստներին եւ ԱԻՄ-ականներին։ Միակ պատգամավորը, որը դեմ քվեարկեց պոպուլիստական օրինագծին, Ալեքսան Հակոբյանն էր։ Երկուսից մեկը. կամ նա չի պատրաստվում պատգամավոր վերընտրվել, կամ էլ վստահ է, որ իր մարզում կընտրվի առանց պոպուլիզմի։
