«Առավոտի» նախորդ համարներից մեկում նշել էին, որ Վիկտոր Դալլաքյանի օկրուգը գծվել է ըստ իր ցանկության։ Մինչդեռ ԿԸՀ-ի մի աղբյուրից հայտնի դարձավ, որ այդ ընտրատարածքից դուրս են մնացել Դսեղը, Գուգարքը եւ պարոն Դալլաքյանի համար ցանկալի եւս մի քանի գյուղեր։ Եթե նույնիսկ օկրուգը ձեւավորվեր Վիկտոր Դալլաքյանի ցանկությամբ, ապա նա ընտրվելու քիչ հնարավորություն ունի, քանի որ այդ ընտրատարածքում իր թեկնածությունն է առաջադրելու Ճաճոյի Էդոն։ Հանրապետական կուսակցության ցուցակում էլ, Վիկտոր Դալլաքյանը կլինի ոչ անցողիկ մասում։
Ցավակցելով պրն Դալլաքյանին, այնուամենայնիվ, ուրախությամբ նշենք, որ Ճաճոն՝ Լեդի Հակոբի, Դոդի Գագոյի, Բուռնաշի եւ նման մի շարք այլ գործիչների հետ միասին կազմելու են անկախ Հայաստանի առաջին պրոֆեսիոնալ խորհրդարանի ինտելեկտուալ կորիզը։
ՎԱՏ ԼՈՒՐ
Կարդացեք նաև
Վերջին երեք օրերին Էջմիածին քաղաքը հայտնվել է լրիվ շրջափակման մեջ։ Քաղաքի հացի փռերը հոսանքազրկվել են եւ, փաստորեն հնարավորություն չունեն հաց արտադրելու։ Այս միտումնավոր «բլոկադան» ստեղծվել է այն նպատակով, որ էջմիածինցիներն ուտեն ուժայիններից մեկի սեփականություն հացի գործարանի արտադրած հացը։
Քաղաքը զրկվել է նաեւ կաթնամթերքի համեմատություն կատարելու հաճույքից։ Թույլ չի տրվում քաղաք մտցնել Երեւանի, Աշտարակի եւ այլ տարածքների արտադրած թթվասերը, կաթն ու կաթնաշոռը։ Հավանաբար շատ շուտով Էջմիածինը կդառնա միակ մենատնտեսն ու մենակերը։ Ուժով նույն հացն ու կաթնամթերքը կերցնելը կարող է սրտխառնոց առաջացնել, իսկ առջեւում խորհրդարանական ընտրություններն են։
