ՀԺԿ համագումարը դռնփակ նիստում միաձայն նախագահ է ընտրել Կարեն Դեմիրճյանին։ Ընտրվել է նաեւ կուսակցության վարչություն 96 անդամով։ 53-ը ՀԺԿ տարածքային կազմակերպությունների ղեկավարներն են։ Ասենք նաեւ, որ ՀԺԿ համագումարի առաջին օրը զուռնա-դհոլ էին նվագում այն դահլիճի առջեւ, որտեղ ընթանում էին այդ ատյանի աշխատանքները։ Երաժիշտներն Արմավիրի մարզի Նորապատ գյուղից էին։ Դա այն գյուղն է, ուր նախագահական ընտրարշավում առաջին ոչխարը մորթվեց Դեմիրճյանի ոտքերի տակ։ Համագումարից հետո չմորթելով ոչ մի ոչխար, ՀԺԿ-ն կարեւոր քայլ կատարեց դեպի քաղաքական պայքարի քաղաքակիրթ նորմեր։
ՎԱՏ ԼՈՒՐ
ԱԺ Վերահսկիչ պալատը, վարկերի իրացման արդյունավետությունը ստուգելու իր հայրենանվեր առաքելության շրջանակներում, վերջերս ստուգումներ անցկացրեց Կրթության եւ գիտության նախարարության կրթական ծրագրերի կենտրոնում։ Այն նախարարության եւ Համաշխարհային բանկի միջնորդ օղակն է՝ կրթությանը տրամադրված վարկի ծրագրում։ Վարկերի ծախսման հայաստանյան ավանդույթները լավ իմանալով՝ չենք կասկածում հայտնաբերված չարաշահումների եւ անօրինականությունների իսկությանը։ Սակայն չար լեզուներն ասում են, որ ԱԺ Վերահսկիչ պալատի նախագահ Աշոտ Թավադյանը խիստ ու երկարատեւ ստուգումներ անցկացնելու այլ՝ անձնական պատճառներ էլ ուներ։ ՀԲ-ի վարկով ֆինանսավորվող դասագրքերի մրցույթում այս տարի նաեւ պարոն Թավադյանի եղբոր՝ Լ. Թավադյանի 9-10-րդ դասարանների քիմիայի դասագիրքն է ներկայացված, որը հաղթող ճանաչելու ցանկությունն է ստիպել ավելի ջերմեռանդ լինել ստուգումներում։ Սակայն ճնշման այդ ձեւը, հավանաբար, իրեն չի արդարացրել, քանի որ դասագիրքն, այնուամենայնիվ, մերժվել է։
