Փետրվարի 21-ին «Երեւաննախագիծ» ինստիտուտի դահլիճում տեղի ունեցավ հանդիպում ԱԺՄ վարչության անդամ, ԱԺ պատգամավոր Արշակ Սադոյանի հետ։
Չնայած դահլիճը մարդաշատ չէր, բայց, այնուամենայնիվ, քաղաքական գործիչը հարկ համարեց ներկայացնել իր տեսակետներն այսօր հանրապետությունում տիրող իրավիճակի շուրջ։
– Պրոբլեմը նա է,- այսպես սկսեց ԱԺՄ անդամը,- որ բոլորի աչքի առաջ, երբ երկաթուղային եւ օդային հաղորդակցությունն էլ լավ է աշխատում, այս երկիրն արդեն քանի տարի է առաջ գնալու փոխարեն հետ է գնում։ Մեր աչքի առաջ ավերվում է տնտեսությունը, դպրոցը, առողջապահական համակարգը։ Եվ այսպես շարունակել չի լինի։ Եթե Լեւոնի ժամանակ բան կար ծախելու, այժմ՝ ոչ, եւ այնքան են շատացել շերեփավորները, որ չեն էլ կարողանում իրար մեջ բաժանել մնացածը։ Այժմ այնպես է իրավիճակը, որ նոր եկած իշխանավորները հներից «նալոգ» են վերցնում, ասելով. «դուք այսքան թալանեցիք, մի մասն էլ մեզ տվեք»։ Իշխանությունը բաժանված է երկու հսկա թեւերի՝ Վ. Սարգսյանի, այսպես ասած «երկրապահական» խմբավորում, իսկ մյուսը Ռ. Քոչարյանի թեւի, որին են հարում Ս. Սարգսյանը, Ս. Բաբայանը եւ նրանց հարող կամ էլ չհարող դաշնակցական որոշ գործիչներ։ Այստեղ տեղին է ասել ժողովրդական խոսքը. «Երկու գլուխ մի ղազանում չի եփվի»։ Եվ այդպես էլ պարզ չէ, թե հանրապետության առաջին դեմքը ո՞վ է։
Ա. Սադոյանը կոչ արեց բոլորին համատեղ պայքարել, քանի որ ԱԺՄ-ն 7-8 տարի է՝ իր բռնած գծով գնում է եւ դեմ առնում պատին, ոչ մի արդյունքի չհասնելով։ Ըստ Սադոյանի՝ կամ հրացանավորների հետ պետք է գնալ հեղաշրջման, կամ էլ խաղաղ ճանապարհով՝ ժողովրդի հետ։ Խաղաղ ճանապարհով իշխանությունը փոխելու համար բոլորի մասնակցությունն է պետք։
Կարդացեք նաև
Անդրադառնալով մայիսի 30-ին նշանակված ԱԺ պատգամավորական ընտրություններին, նշեց, որ ազգովի կանգնելու դեպքում, կեղծիքներ չեն լինի։ Այնուհետեւ ներկաներին բացատրեց. թե հեղափոխությունը երբ են անում.
– Հեղափոխությունը պետք է անել ոչ թե ընտրությունների հաջորդ օրը, այլ ընտրության օրը։ Ոչ թե սեպտեմբերի 25-ին պետք է «չափարները» կոտրեինք, այլ քվեարկության օրը։
Ա. ԼԱՎՉՅԱՆ
