Երեկ ՌԴ-ում ՀՀ դեսպանությունից տեղեկացանք, որ Յուրի Սենկեւիչի «Հայաստանի ոսկին» հաղորդման շնորհանդեսը տեղի կունենա դեսպանատան շենքում եկող ուրբաթ օրը։ Հաղորդումն ինքնին ներկա փուլում շատ կարեւոր է, քանի որ ԽՍՀՄ փլուզումից հետո առաջին անգամ Ռուսաստանի հեռուստատեսությամբ ողջ ԱՊՀ-ին Հայաստանը ներկայացվում է ոչ որպես պատերազմական կամ քաղաքական բուռն իրադարձությունների գոտի։ Դրանից բացի, հաղորդումը Հայաստանը ԱՊՀ-ին ներկայացնելու եւ զբոսաշրջիկությունը զարգացնելու ուղղությամբ նախապատրաստված մեծ ծրագրի առանցքային մասերից մեկն է։ Ըստ մեր ունեցած տեղեկությունների, շնորհանդեսին ներկա կլինեն բարձրաստիճան հյուրեր, ԶԼՄ-ների ներկայացուցիչներ։
ՎԱՏ ԼՈՒՐ
Հայաստանի գյուղերում լայն տարածում է գտել «նիսյայով թաղման» պրակտիկան։ Ինչպես հայտնի է, գյուղական շրջաններում ընդունված է թաղման գնալ որոշակի գումարով՝ սգավորներին նյութական աջակցություն ցույց տալու համար։ Սակայն վերջին շրջանում սոցիալական վիճակի վատթարացման հետեւանքով մարդիկ այլեւս ի վիճակի չեն լինում թաղման համար գումարներ հատկացնել։ Իրավիճակից դուրս գալու նպատակով հանգուցյալի տանը հատուկ մատյան են պահում, որտեղ գրանցվում են եկողների ազգանունները։ Դա փաստորեն դառնում է պարտատերերի ցուցակ, որով հնարավորության դեպքում գումարներ են վճարվում։
