Պետական ռադիոն եւ հեռուստատեսությունը, որոնք մշտապես արտահայտել եւ արտահայտում են օրվա իշխանության տեսակետը, «ազգային» անունն են կրում: Դրանում, սակայն, առանձին հավակնություններ չկան: Եթե որեւէ մեկը, ասենք, նման անունով իր սրճարանն է բացում, ապա այս պարագայում մարդիկ դժվար թե թաքնված ակնարկ տեսնեն, թե մնացած՝ մրցակից սրճարաններն ապազգային են:
Պետք չէ՞ քաղաքականացնել
Հասարակության ծանր վիճակով մտահոգված որոշ հրապարակախոսներ գտնում են, որ մեր դժբախտությունների հիմնական պատճառը կյանքի չափից դուրս քաղաքականացված լինելն է: Իրոք, ինչպե՞ս կարելի է քաղաքական նշանակություն տալ քաղաքականության հետ ոչ մի կապ չունեցող այնպիսի երեւույթների, ինչպիսիք են ջրի, էլեկտրաէներգիայի եւ հեռախոսավարձերի պարբերական բարձրացումները:
Մարդկային ոչ ձեւական հարաբերություններ
Կարդացեք նաև
Մենք մեզ կատարելապես երջանիկ ենք զգում միայն ոչ ձեւական հարաբերությունների պայմաններում՝ հարազատների, համագյուղացիների, թաղի տղերքի հետ շփվելիս: Սակայն հենց այդ, ոչ ձեւական հարաբերությունների պատճառով դեղատներում թունավոր դեղեր են վաճառվում, իսկ պետական ցուցասրահից՝ նկարներ են անհետանում:
Լ.-Հ. ԱԲՐԱՀԱՄՅԱՆ
